ثانيًا: نوعِ بشرڭ أڭ يوكسك، أڭ مستقيم، أڭ صادق بو درت طائفه‌سى؛ آدم (ع‌س) زمانندن بَرى حدسز حجّتلر، معجزه‌لر، كرامتلر، دليللر، كشفياتلر ايله بتون قوّتلريله دعوا ايدوب و بشرڭ أكثرى اونلرى تصديق ايتدكلرى حقيقتِ توحيد، ألبته گونش گبى قطعيدر. بو حدسز مشاهيرِ إنسانيه، يوز بيڭلر معجزه‌لرله و حدسز حجّتلرله طوغريلقلرينى و حقّانيتلرينى گوستروب توحيد و وجوبِ وجود و وحدتِ خالق گبى مثبت مسئله‌لرده إتّفاقلرى و إجماعلرى اويله بر حجّتدر كه؛ هيچ بر شبهه‌يى بيراقماز. عجبا كائناتڭ أهمّيتلى نتيجۀِ خلقتى و زمينڭ خليفه‌سى و ذى‌حياتلرڭ إستعدادجه أڭ جمعيتلى و يوكسگى اولان نوعِ بشرڭ أڭ مستقيملرى، أڭ صادق و مصدّق مرشدلرى و كمالاتده رئيسلرى اولان مذكور او درت طائفه‌نڭ إجماع و إتّفاقله ايمان ايدوب خبر ويردكلرى و كائناتى بتون موجوداتيله دليل گوستروب حقّ اليقين، عين اليقين، علم اليقين إعتقاد ايتدكلرى و صارصيلماز قناعت گتيردكلرى بر حقيقتى طانيميان و إنكار ايدن، حدسز بر جنايت و نهايتسز بر عذابه مستحق اولماز مى؟

سكزنجى كلمه: {غَيْرِ الْمَغْضُوبِ عَلَيْهِمْ وَلاَ الضَّالِّينَ} در. بونده‌كى حجّته قيصه بر إشارتدر

أوت تاريخِ بشر و كتبِ مقدّسه، تواترلره و كلّى و قطعى حادثات و معلومات و مشاهداتِ بشريه‌يه إستنادًا بِالإتّفاق، صريح و قطعى بر صورتده خبر ويرييورلر كه: صراطِ مستقيم أهلى اولان پيغمبرلره (عليهم السلام) بيڭلر واقعاتده إستمدادلرينه خارقه بر طرزده غيبى إمداد گلمه‌سى و اونلرڭ ايستدكلرى عينًا ويريلمسى و دشمنلرى اولان منكِرلره يوزر حادثاتده عين زمانده غضب گلمه‌سى و سماوى مصيبت باشلرينه اينمسى قطعى شكسز گوسترر كه؛ بو كائناتڭ و ايچنده‌كى نوعِ بشرڭ حكيم و عادل و محسن و كريم و عزيز و قهّار بر متصرّفى، بر ربّى وار كه؛ نوح و إبراهيم، موسى و هود و صالح گبى (عليهم السلام) چوق نبى‌لره پك خارقه بر صورتده تاريخى و گنيش حادثه‌لرله مظفّريت و نجاتلرى ويرمش و ثمود و عاد و فرعون قَوملرى گبى چوق ظالملره و منكِرلره دخى، پيغمبرلره عصيانلرينه مقابل دنياده دخى بر جزا اولارق، باشلرينه دهشتلى سماوى مصيبتلر اينديرمش