ايشته سَوْگيلى استادم! بو حادثات دماغمزى داها زياده تقويه ايتمش بولونويور و بزى سزه داها زياده ربط ايدييور. هر خصوصده بزى حمايه و وقايه ايتمكده اولديغڭزه كافى و داها قطعى بر برهان يرينه گچمش بولونويور.

سَوْگيلى استادم! بو هفته خطِّ دستڭزله پك چوق زحمت چكه‌رك، بيڭ مشكلات ايچريسنده يازديغڭز، بتون قرآنده‌كى توافقاتى گوسترر بر نكته‌يى داها آلدم. بوندن باشقه بو نكته گبى عمومى اولوب، يالڭز طرزلرى آيرى اولمق اوزره ايكى توافقات ليسته‌سى داها يازيلاجغى إشعار بيورلييور. اونلرى ده صبرسزلقله بكله‌يورز و يورغونلغڭزى خاطرلادقجه، يوركلريمز صيزلايور. جنابِ حق سزلره لايق بر طرزده خيرِ كثير إحسان أيله‌سين. آمين!

قرآنِ كريمڭ آيات و كلمات و حروفاتنده گورونن إختلاف بَرطرف ايديلمك اوزره، يڭيدن حقيقى و أساسلى بر صورتده آيات و كلمات و حروفاتڭ تثبيت ايديله‌جگى حقّنده‌كى إشعارِ فاضلانه‌لرى، جدًّا شايانِ تبشيردر. بو و بو گبى أحوال، بزى استاديمزڭ علوى و عمومى اولان وظيفه‌سنده هر وقت ايچون جنابِ حقدن موفّقيت طلبنده بولونمقلغه سَوق ايدييور. بِالخاصّه قارداشمز حاجى نوح بگه يازيلان مكتوب صورتى و بوڭا مماثل ديگر مكتوبات، بزم حياتمزى دگيشديرمش و مستقبلده‌كى حياتمزه نورلر سرپديگى گبى، بوگونكى إنسانلغڭ گرفتار اولديغى رياكارلق، تَبَصبُصْ و تملّق و أمثالى گبى پك چوق أخلاقِ رذيله‌دن قورتارمش و هر بررلرينڭ يرلرينه ده أخلاقِ حسنه فدانلرى غرس ايده‌رك، برر شجرۀِ عاليه و نافذه‌نڭ وجوده گلمه‌سنه سببيت ويرمشدر. حتّى او قدر دييه‌بيليرم كه، بوگونكى بشريتڭ طويغولرندن بام‌باشقه بر حياته سَوق ايتمش و هر آن ”خالقمز بزدن نه صورتله راضى اولاجق و بوگون نه گبى بر سعى ايله صحيفۀِ حياتمى قپاته‌جغم؟ عجبا اُمّتى بولونديغمز او سَوْگيلى پيغمبرِ ذى‌شان عليه الصلاة والسلام أفنديمزڭ، ضلالت يولنى طوتان وياخود ضلالته گيدنلرڭ آرقه‌لرندن گيدن امّتلرينى، نه صورتله طريقِ هدايته گتيرمك ايچون سعى ايتسه‌ك خوشنوديتِ پيغمبرى‌يى (ع‌ص‌م) جلب ايده‌بيليرز؟“ طويغولرى و مفكوره‌لرى ايله ياشاتمقده‌در