بو عريضه‌مى تقديم و تصديعه ايكى سببِ مُجبر حاصل اولدى:

برنجيسى: سَوْگيلى استاديمڭ گچنكى إلتفاتنامه‌لرينڭ بر فقره‌سنده بيورلييور كه: ”بو فقير ايله عزيز قارداشم خسرو گبى يوكسك، جدّى، خالص قارداش و طلبه‌لريمى، آخرِ عمريمزه قدر خدمتِ قرآنده دائم أيله‌سين.“

معزّز استاديمڭ بو دعا، بو نياز و همّتلرينه بتون موجوديتمله آمين ديدم و دائما ده دييورم. و جنابِ لم يزل حضرتلرينه ده دائما نيازم بودر. و پك محترم و پك سَوْديگم استاديمڭ دعا و همّتى سُرور، سَوينج گوزياشلريمى آقيتديرييوردى. بو فقره و جمله‌يى تعقيب ايدن ايكنجى فقره كه؛ عينًا يازييورم:

”و بن ئولديگمده سزى آرقه‌مده وارث بيراقه‌رق فرح ايله كدرسز قبريمه گيرمك رحمتِ إلٰهيه‌دن اُميد ايدرم.“ بوراسى بنى چوق دوشونديردى و هيچ بر دقيقه استاديمڭ بو آرزو، بو طلب و رحمتِ إلٰهيه‌دن بو اميدى، ذهنمدن و فكرمدن و قوّۀِ خيالمدن هيچ چيقمييور. بناءً عليه بو فقره‌يه بتون ذرّاتِ موجوديتمله آمين ديدم و جنابِ حقّڭ فضل و كرمنى تضرّع و نياز ايتدم.