سزلر بنم ايچون چوق أهمّيتليسڭز. ”صدّيقِ وفى بو زمانده يوقدر“ ديينلره قارشى سزلرى گوسترييورم. يگرمى سنه وانده گچيرديگم حياتِ علميه.. بنم ايچون وان چوق قيمتداردر. ِﷲ الحمد سزلر او قيمتدارلغى گوسترديڭز. و وانه قارشى شديد حسّياتمه تام مقابله ايدييورسڭز. سزه مدارِ عبرت بر واقعه سويله‌يه‌جگم، شويله كه:

گچن سنه بارلالى، إستانبول تجارتنده بولونان بكر أفندينڭ شريكى محمد أفندى واسطه‌سيله بر مكتوب آلدم. مكتوب خارقه اولارق بڭا گوروندى. چونكه خلوصى بك، ”نوح بگله گوروشدم“ دييه او مكتوبده بڭا يازييور. عين مكتوبده، قارداشم عبد المجيد ده، منلا حامدڭ سلام و دعاسنى بڭا يازييور. عين مكتوبده نورشينِ سفلٰى‌ده منلا عبد المجيدڭ يازيسى و إمضاسى واردى. فسبحان اﷲ ديدم. أڭ زياده سَوْديگم بو إنسانلرڭ آيرى آيرى مملكتده بولونمقله برابر، بر مكتوبده بونلرڭ إجتماعلرى توافقلى بر لوحۀِ تماشادر.

بو سنه ينه او محمد أفندى أگيرديره گلمش. ينه نوح بگڭ عين تلغرافنى، او ذات بڭا گتيردى. فسبحان اﷲ ديدم. نوح بگڭ لسانِ حالى، گويا محمد أفندى‌يه ”دوستم بن سنڭله برابر استادمله گوروشه‌جگم“ دييور، تخيّل ايتدم. صوڭره ينه او محمد أفندينڭ خدمتكارى أگيرديره گيدوب محمد أفندينڭ مكتوبلرينى گتيرمش. ينه نوح بگڭ هديه‌يه عائد، بڭا اولان مكتوبنى گتيردى. ديدم، قطعيًا بو ايش تصادفى دگل. صوڭره مكتوبڭ مشتملاتنه دقّت ايتدم. تخمين ايتدم، وانده نوح بگڭ بڭا حاضرلاديغى هديه‌يى گوندرمك تاريخنده، بن ده عين تاريخده، عين فيآتده (حاشيه) بر هديۀِ عظيمه‌يى نوح بگڭ نامنه وانده‌كى إخوانمه گوندرييوردم. ايشته بو ايكى توافق، بڭا إشارتدر كه: نوح ايله حامد، طلبه‌لك و قارداشلق ايچون من طرف اﷲ إنتخاب ايديلمشلر. چونكه توافق بزم ايچون بر أمارۀِ توفيقِ إلٰهى اولديغنه قناعتم گلمش. رساله‌لرده توافقاتڭ بعض نمونه‌لرينى گوره‌جكسڭز