بن هيچ بر عربيات گورمه‌دن، مدرسه‌‌ده بش اون سنه اوقوماديغم حالده؛ يالڭز رساله‌لرى يازوب جدّيتله اوقودم. كنديمى يگرمى سنه مدرسه‌‌ده اوقومش گبى تخيّل ايدييورم. سببى ايسه؛ بو عاجزڭ، بو فقيرڭ، بو مسكينڭ نزدينه چوق عربيات خواجه‌لرى گلييور و بنم اوقوديغمه حيرت ايدييورلر. أوّلدن مرشدِ كامل تربيه‌سى گورمش إنسانلر گلييورلر، بندن ايشيتدكلرى كلمه‌لره مفتون اولويورلر. چوق خواجه‌لر ايكى ديز اوزرينه گلوب، رساله اوقويووير دييورلر

أگر سسم ايريشسه ايدى اولانجه قوّتمله باغيرارق، كُرۀِ أرضده‌كى گنجلره دييه‌جكدم: ”رساله‌لرى جدّى اوقومق و يازمق، يگرمى سنه مدرسه‌‌ده اوقومقدن فائقدر و داها منفعتليدر.“ مدرسه‌‌ده اوقومقده‌كى مقصد؛ أوّلا كندينى قورتاروب، ثانيًا اُمّتِ محمّدى (ع‌ص‌م) قورتارمغه چاليشمق دگل مى؟ رسالة النور و مكتوبات النور، يگرمى سنه‌لك مدرسه علمنى ويرييور إعتقادنده‌يم

و هر بر رساله، تك باشيله بر مرشدِ أكملدر. قلبى بوزولمه‌مش هر هانگى گنج، بر رساله‌يى آلوب دقّتله و تسليميتله اوقوسه، دائرۀِ إنقياده گلييور، إصلاح اولويور. هر هانگى بر مادّيون بر رساله‌يى آلوب اوقورسه، ايمان ايتمزسه ده هيچ بر بهانه بولامييور. هر هانگى بر دينسز اوقوسه و تمام معناسيله آڭلاسه، ايمانه گلييور. هر هانگى بر فيلسوف اوقوسه، ”بوندن داها يوكسك عقل اولاماز و عقللر طوپلانسه بونڭ فوقنه چيقاماز، عقل بوڭا يول بولاماز“ دييور. رسالۀِ نور، لسانِ حال ايله آوروپا مفتونى بولونان تك گوزلى دجّاله ”يا ايمان ايت، ياخود بتون دنيانڭ مسخره‌سى اولاجقسڭ“ دييور

شيمدى عزيز درس قارداشلرم! بو فقير، بر دانه مرشدِ أكمل و قطب آراركن، جنابِ حقّڭ إحسانيله، كرميله، لطفيله، رحمتيله، استادِ محترمڭ سعيى ايله يوز اون طوقوز مرشدِ أكمل و كامل بولدم. رسالة النور و مكتوبات النور، يوز اون طوقوز عدديله، هر بريسى برر مرشدِ أكملدر و أقطابدر