أى مادّى و معنوى ياره‌لى اولان گنج قارداشلرم! و أى مرشدِ أكمله محتاج اولان أهلِ طريقت قارداشلرم! شيخ عبد القادرِ گيلانى و شاهِ نقشبند، إمامِ ربّانى، إمامِ غزالى، محيى الدينِ عربى، مولانا خالد رضى اﷲ عنهم، قَدَّسَ اﷲُ أسرارهم حضرتلرينڭ درجۀِ كمالاتلرى، مراتبِ ايمانلرى رساله‌لرده و مكتوباتده واردر. حاشيه

-------------------------------------------------

(حاشيه : مرحوم بيوك قارداشم مصطفى، رساله‌نڭ شاكردلريله ولايتڭ شاكردلرينى و بربرينڭ آراسنده‌كى درجه‌يى آڭلاتمق ايسته‌يور. بو مسئله‌يى رسالۀِ نور حلّ ايتمش. هم توحيدِ عامى ايله توحيدِ حقيقى‌يى گوسترمش. هم گوزى قپالى اولارق گيتمه‌نڭ و گوزى آچيق اولارق گيتمه‌نڭ فرقنى رسالۀِ نور بيان ايتمش. هم عالمِ يقظه ايله عالمِ منامى رسالۀِ نور كشف ايتمش. هم عالمِ مثال ايله عالمِ شهادتى بربرندن رسالۀِ نور آييرمش. هم ولايتِ كبرايى، ولايتِ وسطا‌يى، ولايتِ صغرا‌يى و بربرينڭ فرقنى تماميله رسالۀِ نور گوسترمش. بر صحبتده، بر قدمده (صحابه‌لرڭ مَثلى گبى) ظاهردن حقيقته گچمه‌نڭ سببلرينى آڭلاتمش. هم طريقت شيخلرينڭ و أئمّۀِ أربعه‌نڭ جادّه‌لرينى رسالۀِ نور بيان ايتمش. هم علم اليقين، عين اليقين، حقّ اليقين ايله ألده ايديلن ايمانڭ فرقلرينى رسالۀِ نور گوسترمش. هم حضرتِ أبو بكرِ صدّيق (رض) و حضرتِ عُمَر (رض) و حضرتِ عثمانڭ (رض) مشربنى رسالۀِ نور تعقيب ايتمش. هم إمامِ على‌نڭ (رض) بر ولدِ معنويسى اولديغنى، جلجلوتيه‌يى تفسير ايله رسالۀِ نورڭ قيمتنى و وظيفه‌سنى رسالۀِ نور گوسترمش. هم رسولِ أكرم عليه الصلاة والسلامڭ مهدى و عيسى عليه السلام و دجّال و يأجوج مأجوج و سدِّ ذو القرنيْن حقّنده‌كى متشابه حديثلرى رسالۀِ نور تأويل ايتمش، أساس مقصدى آڭلاتمش. إمامِ على (رض)، شاهِ گيلانى (رض)، سكزنجى، اون سكزنجى، يگرمى سكزنجى لمعه‌لر ايله و سكزنجى شعاع ايله كراماتِ أوليا حق اولديغنى و يرده ايكن عرشِ أعظمى مشاهده ايتدكلرينى رسالۀِ نور بيان ايتمش. هم عموم مجتهدلر ”متكلّميندن بريسى گله‌جك، حقائقِ ايمانيه‌يى و بتون مسائلى واضح بر صورتده بيان ايده‌جك“ دييه مژده‌لرينى، رسالۀِ نور حادثاتِ عالم ايله إثبات ايتمش. هم بتون هر عصرده گلن مبعوثلر، وليلر كشفياتلرنده، ”بريسى گله‌جك، شرقدن بر نور ظهور ايده‌جك“ دييه رسالۀِ نورڭ شخصِ معنويسنى و استاديمڭ شخصِ معنويسنى و طلبه‌لرڭ شخصِ معنويسنى گوروب، بتون اُمّتِ محمّده (ع‌ص‌م) رسالۀِ نورڭ فضيلتنى، أهمّيتنى، قيمتنى و أمرِ پيغمبرى ايله بتون اُمّت وردلرنده عذابِ قبردن و آخر زمانده گله‌جك فتنه‌دن، دجّالڭ شرّندن إستعاذه ايتمه‌لرينى و ياپاجغى مادّى و معنوى تخريباتنى رسالۀِ نور تعمير ياپديغنى گورمشلر. مژده‌لر، بشارتلر، إشارتلر، رمزلر ايله خبر ويردكلرينى، رسالۀِ نور، أسكيشهر، دڭزلى، آفيون، إستانبول گبى حادثاتِ عالم ايله گوسترمش. الحاصل: عصرلردن بَرى بكله‌نيلن و منتظر قالينان ذات، رسالۀِ نور ايمش. حتّى استادڭ كنديسى ده بر زمان بويله بر ذاتڭ گله‌جگنه منتظر ايمش. حالبوكه نه آغابگم مصطفى‌نڭ و نه ده بنم حدّم دگل كه، رسالۀِ نورڭ قيمتنى و وظيفه‌سنى بيان ايده‌يم، هيهات! رسالۀِ نور، قرآنڭ خاص تفسيرى اولديغندن قرآنه باغليدر. قرآن ايسه عرشِ أعظمه باغليدر. اونڭ ايچون، رسالۀِ نورى قرآن مدح و ثنا ايده‌بيلير. برنجى شعاعده اوتوز اوچ آيتيله إشارت ايتمش. بونى يازمقدن مقصدم؛ آغابگم مصطفى‌يه، رسالۀِ نوردن مدد و قرآندن شفاعت و استادمدن دعا ايسته‌مكدر. طلبه‌ڭز كوچك على