اون دردنجى لمعه‌نڭ برنجى مقامنى تشكيل ايدن ايكى مسئله بنجه چوق مهمدر. بو درسڭ تقرير و تحريرينه وسيله اولان رأفت بك قارداشمزدن اﷲ راضى اولسون. ايكنجى مقام باشلى باشنه بر شاه أثردر. ”بسم اﷲ الرحمن الرحيم“ حقّنده‌كى بيان بويوريلان آلتى سرّ، اويله بر خزينۀِ أسرارِ ربّانيدر كه؛ آنجق رحمٰنِ رحيمڭ عنايتيله بو مبارك أثرى اوقويوب آڭلايانلر اوندن ذوق آلابيليرلر.

بوندن أوّلكى بر مكتوبده، إختيارسز برنجى سوزى تشكيل ايدن ”بسم اﷲ الرحمن الرحيم“ حقّنده‌كى مبارك أثردن، قلبِ عاجزى‌يه گلن بعض خوش تفكّراتدن بحث ايتمشدم. دائما شفقتله دعا و درسلرندن إستفاده ايتديرن معزّز استادم، بنم داها أوّلدن ده ”بسم اﷲ الرحمن الرحيم“ ايچنده‌كى رحمٰن و رحيم إسملرينڭ حكمتِ تخصيصى خصوصنده‌كى سؤالمه‌، ايكنجى و مطنطن بر جواب داها لطف ايتمش اولويورلر. بو مظهريتدن طولايى، خالقِ رحيمه نه قدر شكر ايتسه‌م آزدر.

فهرسته‌يى حرفى حرفنه هنوز اوقويه‌مدم، فقط إن شاء اﷲ اوقويه‌جغم. اون برنجى مكتوبڭ نه‌لرى إحتوا ايتديگنى اوگرندم. يازيلميان و رحمتِ إلٰهيه‌دن يازيلماسنه موفّقيت نياز اولونان آثارڭ ده نشرينه موفّقيتڭزى، ألطافِ سبحانيه‌دن تضرّع و نياز أيلرم. اوتوزنجى سوزڭ، محكمه باش كاتبنى ناصل تهديد ايتديگى خاطره‌سنى تماميله گوزيمڭ اوڭنه گتيردم.

فهرستۀِ گلدسته: فهرسته نامى آلتنده‌كى بتون رساله‌لرده يازيلى اولديغى طرزده دگلدر. تمامًا خصوصيت گوسترمكده‌در. سوزلرڭ و مكتوبلرڭ بر خلاصة الخلاصه‌سى دينه‌جك وضعيتده‌در.

آثارِ نورڭ بر زبده‌سى، خزائنِ نورڭ ألماس آناختارى، رسائل و مكتوباتڭ نورلى قپوسى اولان بو خيرلى تأليفه سبب اولانلرى ده، مؤلّفنى ده، اﷲ ذو الجلال و الكمال حضرتلرى، سعادتِ داريْنه مظهر بيورسون. آمين!