أوت رسالۀِ نورده اويله بر قوّت واردر كه، آوروپانڭ أڭ معنّد فيلسوفلرينى دخى تسليمه مجبور ايدر. هر روحڭ بر إحتياجِ حقيقيسى اولان، حقيقى ايمان نورينى آرايان خرستيان موحّدلر، ألبته رسالۀِ نورى گورسه‌لر (حضرتِ عيسى عليه السلامڭ وصاياسى نوعندن) قبول ايدوب صاريلاجقلردر

بو رساله فهرسته‌سى، حقيقةً منبعِ نور و مجمعِ حقيقتدر. الحقّ نور فهرسته‌لريدر. شويله سويله‌يه‌بيليرم كه: اوتوز اوچ سوز، اوتوز اوچ مكتوبڭ هر برى، فيضانده اولان برر منبعِ نورِ حقيقت و گلستانِ باغِ جناندر. بناءً عليه بو متعدّد گللر باغنڭ هر بريسندن متعدّد گللر قوپاروب، درت قسم اوزرينه گللر دَمَتى ياپيلمش گبى، وجوده گتيريلمش بر أثرِ جهان‌قيمت اولديغنه قناعت ايتدم

بو فهرسته‌لرى اوقومق؛ هر حالده و بهمه‌حال سوز و مكتوبلر رسالۀِ شريفه‌ڭزى گورمك، اوقومق، يازمق ايچون إنسانى إشتياق و غيرته سَوق ايدييور و شدّتلى قامچيلييور. فقيرجه نقصان اولان رسالۀِ شريفه‌لرڭ هانگيسنى أوّلا يازه‌يم؟ چونكه هر برى بربرلريله نور و حقيقت مسابقه‌سنه چيقمش دييه، متلاشى و هيجانلى بر وضعيتده‌يم. إن شاء اﷲ (دعاىِ استادانه‌لريله) كافّه‌سنى يازارم. شوراسنى ده عرض ايتمك ايسترم كه: صبرى أفندى قارداشمڭ إلحاحى و ذاتِ استادانه‌لرينڭ إلهامى ايله فهرسته‌لرڭ تأليفى، چوق مصيب و خيرلى، هم حدسز حقيقتلره آناختار اولمشدر

جنابِ حق، سَوْگيلى استاديمزى عافيتده دائم، عمرلرينه بركت و هر بر اُمورنده موفّقيت إحسان بيورسون ده، پك چوق زمانلر باشمزده تاجِ ظفر اولارق طاشييه‌لم و خدمتِ قرآنده چاليشه‌لم، يورولالم، يول آلالم. و جمله مؤمنين ده إستفاده ايتسين و أهلِ بدعه و ملحدلرڭ ده باشلرى يره گلسين