استادم أفنديم!

بوندن بر سنه أوّل (سوزلر و مكتوباتى إستنساخ أثناسنده) بعض نكته‌لر، كندى أمراضِ قلبيه‌مه موافق بر علاج گلديگندن ”أوت بو نكته‌يى آلتون يازى ايله يازمالى“ دييه سويلردم. {اَلْحَمْدُ ِﷲِ هٰذَا مِنْ فَضْلِ رَبِّى} لمعه‌لر تأليف ايديلدى. بتون سوز و مكتوباته فيضلريله آناختارلق ياپدى. شويله كه: قيشڭ أڭ شديد تهلكه‌لى و فورطنه‌لى زماننده (ييرتيجى حيوانلرڭ أڭ آزغين و قوّتلى زمانلرنده) گنيش صحراده، چامورلى بر يولده گيدن بر يولجينڭ إمدادسز، كيمسه‌سز، او تهلكه‌لر ايچنده، دوشه قالقه، يوزده طقسان طوقوز فورطنه‌لر و او ييرتيجى جاناوارلرڭ ألنده پارچه‌لانه‌جغى و تلف اولاجغى هنگامده، كندينى قورتارمق ايسته‌ين او يولجينڭ گوزينه تصادف ايدن، صحرانڭ اورته‌سنده‌كى چليكدن داها گوزل، پولاطدن داها قوّتلى ياپيلمش بر سرايه راست گلمسى، او يولجى‌يى او قدر ممنون و مسرور ايدر كه؛ حتّى او سرايه داها چابوق يتيشوب، ييرتيجى حيوانلر طرفندن پارچه‌لانماسندن خلاص اولمق ايچون قوشارق، عجله‌سندن آياقلرينڭ بيله يره تماس ايتمسنى ايسته‌مه‌ين بو يولجى، كنديسنڭ سرايه گيرمه‌سنه وسيله اولانلره، دگل بتون مالنى ويرمك، بلكه جاننى فدا ايدر.

ايشته عصريمزده سوزلر و مكتوبلر، او يولجينڭ سرايه راست گلمه‌سيله بتون تهلكه‌لردن قورتولديغى گبى، إنس و جنّ جاناوارلرينڭ تهلكه‌لرندن قورتولمق ايچون سوزلرڭ هر برى او قلعه‌دن داها صاغلام بر تحصّنگاه اولديغنه يوز بيڭ قناعتم واردر. ِﷲ الحمد، او سرايڭ آناختار وظيفه‌سنى لمعه‌لرڭ فيضيله بولابيلدم. او تهلكه‌لردن بيچاره ضعيف روحمى قورتارمق ايچون ايچرى‌يه گيردم. گوردم كه: جنّت سكز طبقه اولوب، هيچ بربرينه مانع اولماديغى و بڭزه‌مديگى گبى، برينه گيرديگمده اونڭ لطافتى أوّلكى گيرديگمڭ لذّتنى تازه‌لنديرديگى گبى، رساله‌لر عينًا اويله‌در.