(رسالۀِ نورڭ تسويد و تبييضنده چوق خدمتى سبقت ايدن شاملى حافظ توفيقڭ رسالۀِ نورڭ حقّانيتنه دائر إستخراجى بر فقره‌سيدر)

معلوم اولسون كه: ”زبدة الرسائل عمدة الوسائل“ نامنده قطب العارفين ضياء الدّين مولانا شيخ خالد قدّس سرّه‌نڭ مكتوبات و رسائلِ شريفه‌لرندن مقتبس نصايحِ قدسيه‌نڭ ترجمه‌سنه دائر بر رساله‌يى اون اوچ سنه مقدَّم، بورسه‌ده خواجه‌م حسن أفنديدن آلمشدم. ناصلسه مطالعه‌سنه موفّق اولامامشدم. تا بوگونلرده كتابلريمڭ آراسنده بر شى آراركن أليمه گچدى. ديدم: ”بو حضرتِ مولانا خالد، استاديمڭ همشهريسيدر. هم إمامِ ربّانيدن صوڭره، طريقِ نقشينڭ أڭ مهمّ قهرمانيدر. هم طريقِ خالديۀِ نقشيه‌نڭ پيريدر.“ رساله‌يى مطالعه ايدركن حضرتِ مولانانڭ ترجمۀِ حالندن شو فقره‌يى گوردم:

أصحابِ كتبِ ستّه‌دن إمامِ حاكم مستدركنده و أبو داود كتابِ سُنَننده، بيهقى شعب ايمانده تخريج بيوردقلرى:

يعنى ”هر يوز سنه‌ده جنابِ حق بر مجدّدِ دين گوندرييور.“ حديثِ شريفلرينه مظهر و ماصدق و مُظْهرِ تام اولان مولانا الشّهير قطب العارفين، غوث الواصلين، وارثِ محمّدى، كامل الطريقة العليه و المجدّد‌يه خالدِ ذو الجناحين قُدِّسَ سِرُّهُ إلخ