أسكى بر دوست و علم نقطه‌سنده بر آرقداش اولمق اوزره سزڭله بر حسبِ حال ايده‌جگم. ايكيمزه تعلّق ايدن مهمّ بر مصيبتِ دينيه‌يى سزه خبر ويرييورم. بونڭ تلافيسنه ممكن اولديغى قدر برابر چاليشملى‌يز. شويله كه:

ذاتڭز، هركسدن زياده خدمتمزه طرفدار و حرارتله حمايتكار اولمق لازم گليركن، مع التأسّف مجهول سببلرله عكسمزه طرفگيرانه و بزه قارشى صوغوقجه رقيبانه باقديغڭزدن، اوغلڭزى بو كويده يرلشديروب اوڭا دوست أحباب بولديرمق ايچون چاليشديڭز. نتيجه‌سنده بوراده اويله بر وضعيت حاصل اولمش كه، ماهيتنى دوشوندكجه سنڭ بدلنه روحم تيتره‌يور. چونكه {اَلسَّبَبُ كَالْفَاعِلِ} قاعده‌سنجه بو وضعيتدن گلن گناهلردن، سيّئاتدن سز مسئولسڭز.

زهره ترياق نامى ويرمكله، ترياق اولماديغى گبى؛ زندقه حسّياتنى ويرن و دينسزلگه زمين إحضار ايدن بر هيئتڭ وضعيتنه، نه نام ويريليرسه ويريلسين، گنج يوردى دينيلسين، حتّى مباركلر يوردى دينيلسين، نه دينيليرسه دينيلسين او معنا دگيشمز. باشقه يرلرده، گنج يوردى و توركلك مجلسى، تجدّد محفلى گبى إسم و عنوانلرله بولونان هيئتلر، باشقه شكللرده ضررسز بر صورتده بولونه‌بيليرلر.

فقط بو كويده مادام سكز سنه‌در كه، صِرف أساساتِ ايمانيه و اصولِ حقائقِ دينيه ايله مشغولز. ألبته بو كويده بزه قارشى معنّدانه بر هيئتڭ تعقيب ايده‌جگى أساس، ايمانسزلغه و اصولِ دينيه‌يه مخالف، حتّى زندقه حسابنه بر حركت يرينه گيرر. بيلينسين بيلينمسين نتيجه اويله چيقار. چونكه بو حواليده عمومجه تبيّن ايتمش كه، سياست جريانلريله علاقه‌دار دگلم، بلكه يالڭز حقائقِ دينيه ايله مشغولز. شيمدى بوراده بريسى بزه مخالف حركت ايتسه، حكومت حسابنه اولاماز؛ چونكه مسلگمز سياسى دگل. هم يڭى بدعه‌لر حسابنه ده اولاماز، چونكه حقيقى مشغله‌مز، أساساتِ ايمانيه و قرآنيه‌در