تشنه‌سى بولونديغم تبشيرنامه‌لريڭزى ممنونيتله آلدم. وار اولڭز. جوابلرى يازمق ايجاب ايدر امّا نه يازايم. روح ناخوش، قلب بى‌هوش، قفام بوم بوش. زيرا أطرافِ أربعه‌مدن تقطّر ايدن وحشتلر، قساوتلر، يأسلر، بأسلرى تصوّر ايتدكجه برى جِنّته (يعنى جنونه)، ديگرى جنّته (يعنى شامه) گيتمك اوزره، عقل و روحم سفربر وضعيتنى آلييورلر. بونڭ ايچوندر كه، نه سيدانڭ يعنى استادڭ طلبه‌لگنى و نه ده سزڭ قارداشلغڭزى بِحقٍّ ايفا ايده‌مديگمدن نه يازاجغمى بيله‌مييورم.

هم ده سزدن گلن مكتوبلر صاف، تميز، نورلى بر فكردن چيقديغندن، اوقويانلره ايشيق ويرييور. ظلمتلى فكرمدن چيقان عريضه‌لر ايسه، سزه ظلمت ويره‌جگى إحتمالندن قورقه‌رق تيتره‌يه تيتره‌يه تقديمه جسارت ايده‌مييورم.

سوزلرڭ و مكتوباتڭ و پنجره‌لرڭ فهرسته‌سى او قدر گوزل اولمش كه، بر دفعه سطحى بر نظر عطف ايدن كيمسه، رسالة النور أجزالرينڭ قيمت و أهمّيتى حقّنده يك نظرده بر فكر ايدينه‌بيلير. بو فهرسته عموم رساله‌لره بدلدر. هيچ بر مؤلّف، يازمش اولديغى يوز يگرمى قدر كتابنڭ، هر بريسنڭ خلاصۀِ مئآلندن و بِالخاصّه متننده‌كى آياتى، برر برر مناسب و معنيدار بر طرزده تعداد ايتمك صورتيله رساله‌لرڭ غاياتندن و ماهيتندن بحث ايتمك شرطيله بويله أهمّيتلى درت رساله‌يى وجوده گتيره‌مز. فهرسته‌نڭ بارز بر وصفى داها وار كه، او ده كندى إختياريڭزله اولمايوب، سنوحاتِ قلبيه ايله اولديغنى إثبات ايدييور. بز بو حاللرى گوردكجه، سزڭ گبى بر استاده نائليتمزدن طولايى ربّمزه چوق شكر ايتمكده‌يز.