صنعى بر تواضع ايچون دگل، حقيقتى إفاده ايچون ديرم كه: بوندن أوّل صبرى أفندى قارداشمزه يازديغم كوچك مكتوبمده ده ذكر ايتديگم وجهله، رسالۀِ نور شاكردلرى وجودِ معنويسنده، آنجق كوچك بر آياق پارمغى قدر بر قيمتى اولان بو بيچاره قارداشڭزى، خالقمز بو گناهكار عبدينى نهايتسز إنعام و إحساننه لايق گورمش كه؛ رسالۀِ نور ناشرينه بر طلبه، رسالۀِ نور شاكردلرينه بر قارداش، قرآن خادملرينه بر آرقداش ايتمشدر. عربى و فارسى بيلمه‌ين، علم و مدرسه گورمه‌ين بر عاصى عبدينه، حكمتِ صمدانيّه‌سيله بويله بر إكرامده بولونيشى، ألبته بر حكمته مستنددر. او ده هر حالده رسالۀِ نورله علاقه‌دار اولانلر آراسنده‌كى صفوت و إخلاص ايله، رسالۀِ نورڭ عندِ إلٰهيده‌كى درجه‌سنه و خدمتڭ علويتنه عطف اولونور

ايشته رسالۀِ نور شاكردلرندن أڭ غيرِ نافع بر عضوه، مثال اولارق ذكر ايديلن بو قدر آچيق حمايه و صيانتِ إلٰهى واقع اولورسه، ديگر منوّر عنصرلره نه درجه إكرام و عنايت اولاجغى قياس اولونه‌بيلير

اللّٰهڭ عنايتنه، پيغمبريمز محمّد مصطفى صلّى اﷲ تعالى عليه وسلّم أفنديمز حضرتلرينڭ إمداد و روحانيتلرينه إستناد ايده‌رك، اﷲ رضاسى ايچون خدمته قوشان، يكديگرينى معنوى و اُخروى قارداش طانييان، باشده مشفق استاد، يعنى رسالۀِ نور ناشرى ايله اونڭ شاكردلرينى {فَاِنَّ حِزْبَ اﷲِ هُمُ الْغَالِبُونَ ❊ وَالْعَاقِبَةُ لِلْمُتَّقِينَ} آيتلرينڭ سرلرينڭ تظاهرى إن شاء اﷲ قارشيلايه‌جقدر

إقتصاد حقّنده‌كى رساله هم إنسانى، هم إجتماعى، هم دينى، هم دنيوى چوق گوزل أخلاقى، چوق خوش ايمانى، چوق دگرلى نورانى بر نصيحت‌نامه‌در. بوراده‌كى قارداشلريمزدن بعضلرينڭ، آثارِ نور حقّنده‌كى إختيارسز شو سوزلرى، نه قدر يرنده‌در. دييورلر كه: بو مبارك أثرلردن برى اوقوننجه، ايچمزدن ”بوندن داها يوكسك أثر اولاماز“ ديديگمز حالده، ايكنجيسنى ديڭله‌ديگمز زمان باقييورز كه، بو أوّلكندن داها علوى و نورليدر