أوّلا علوى و غيبى كرامتدن بحث ايده‌جگم: مجموعة الأحزابده أرجوزه نامنده‌كى قصيدۀِ مباركى، فتحى بگده بولدم. بر چوق يرلرينى اوقودم. فضله تدقيق ايده‌مه‌دم. آنجق سكينه نامى ويريلن و إسمِ أعظمى تضمّن ايدن آلتى إسم ”فرد، حىّ، قيّوم، حَكم، عدل، قدّوس جلّ جلاله“ اولارق بولدم. بو أسماءِ مباركه‌نڭ ورد ايديلمسنه مساعده و نه صورتله دوام إقتضا ايتديگنه أمريڭزى إسترحام ايدرم.

مرحوم جدّمڭ حضرتِ على رضى اﷲ عنه أفنديمز حضرتلرينه معطوف و أوّلجه عرض ايتديگم: (كَرَامَاتُ اْلاَوْلِيَاءِ حَقّ ٌ) دستورينى تصديق صددنده‌كى كرامات حادثه‌سنڭ إفاده ايديلديگى بر زمانده، اوراده ده بو مبارك أثرڭ نشر ايديلمش اولماسى؛ جدًّا حيرتى موجب اولمقله برابر، ايشلريمزڭ تصادفله علاقه‌سى اولماديغنى گوستره‌جك كوچك بر دليل و رسالۀِ نور، معجزۀِ كبراءِ أحمديه (ع‌ص‌م) اولان قرآنِ عظيم الشاندن نبعان ايتديگى ايچون، إعجازكار حادثات أكسيك اولميه‌جغنه إشارتدر. {اَلْحَمْدُ ِﷲِ هٰذَا مِنْ فَضْلِ رَبِّى}

بو علوى أثرڭ صوڭنه رسالۀِ نور شاكردلرى نامنه بو عاجز طلبه‌ڭزڭ إسمنى قويمقله، صدّّيقڭزڭ يازيلمش و يازيلاجق بتون رسالۀِ نور لمعاتنه قارشى، تصديقده تردّد ايتميه‌جگنه إشارت اولديغنى، شكرانله قارشيلادم.

سورۀِ رحمٰن‌ده‌كى {فَبِاَىِّ اٰلاَءِ رَبِّكُمَا تُكَذِّبَانِ} آيتِ جليله‌سنده‌كى تكرارلر گبى، رسالۀِ نورڭ مبدأِ نشرندن بو زمانه قدر أنواعِ كرامات و غيبى إعجاز إظهار ايديلمكده و بو فيضلى حادثات، رسالۀِ نور شاكردلرينى غيرته و همّته تشويق أيله‌مكله برابر، اونلرى معنوى سلاحلرله تجهيز ايده‌رك، قوّۀِ ايمانلرينى تزييده وسيله اولمقده‌در.

اﷲ ذو الجلال قرآنِ كريمنده، پيغمبرِ ذى‌شان حديثِ نبويلرنده، جهار يارِ گزين، صحابۀِ كرام و آلِ بيت ناملرينه، حضرتِ على و أولادندن حضرتِ غوث قصيدۀِ مباركه‌لرنده، فتنۀِ آخر زمانده‌كى أڭ مهمّ و قرآنى حركته رمز، دلالت، إشارت، بلكه صراحتله پارمق باصدقلرينى رسالۀِ نور ناشرى، بتون أثرلرنده گوسترر و درسلرنده تكرار تكرار سويلرسه، تردّد و شبهه‌يه ذرّه قدر محل و حق قالير مى؟ أصلا و قطعا. اللّٰهڭ إحساننه يوز بيڭلر حمد و شكرلر اولسون.