محترم مرشدم! كيمڭ حدّى وار كه، رساله‌لرڭ بريسنه أل اوزاتسين وياخود بر صحيفه‌سنه ديل اوزاتسين وياخود بر جمله‌سنى تنقيد ايتسين وياخود بر كلمه‌سنه، حتّى بر حرفنه و بلكه بر نقطه‌سنه إعتراضده بولونسون

بِلا إستثنا هر فرد إستحسان ايدركن، بويله بر شى ياپمق ايچون، بو جرئتى كيمدن آلايم. يوق، سَوْگيلى استادم، مستريح اولڭز؛ سنه‌لردن بَرى چكمكده اولديغڭز، قلعه‌بند جزاسندن پك شديد عذابڭزه، بر باشقه و مهمّ ألم قاتيلماسنه طرفدار اولانلره بر پارچه ميل ايتمك شويله طورسون، بلكه بو حالڭ شدّتله و بلكه فدائيسى اولارق عليهده اولديغمه، وجدانمڭ تصديقى كافى بر شاهددر

بو عصرڭ سيسلى، سملى رواجى (شجرۀِ كائناتڭ ميوه‌سى اولان إنسانڭ نوه، لبّ، قشر غايه‌لرينى) زائل و فانى‌يه، ذلّت و غروره، آفل فراقه، ظاهر باطله، عطالت عدمه، حرص و حيوانيته، جامد و عبثيته، باشى بوزوقلق و هيچلگه سَوق ايله، او ميوه‌نڭ قسمِ أعظمنڭ ئولوب أقلّنڭ ده ئولمك و تفسّخى آننده، مذكور شجره‌نڭ مركز اوزرينه قريب، إسپارطه دالنه تعليق ايديلن، حكيمِ مطلقڭ أتمّ، أكمل شفاخانه‌سى اولان قرآندن نبعان ايدن (ترياق نوطه‌لر) تسميه‌سى ايله، هر نوطه‌نڭ بيڭلر حرفلر طامله‌لرى ايله إمداده يتيشه‌رك، كُرۀِ أرض باغچه‌سنى إسقا و بيڭلر ميوه‌لره حيات بخش ايدن و بو يوزدن منبعى گبى، قيامته قدر خارقه بر كرامت و تقليد ايديلمز بر طرّه ايله چاغلايه‌جق اولان أثرِ مباركى، الحمد ِﷲ إستنساخ ايتدم