عزيز قارداشم! فقه الأكبر اولان أساساتِ ايمانيه ايله مشغول اولديغمز ايچون، نقله و أهلِ إجتهادڭ مداركنه و مآخذينه باقان دقائقِ مسائلِ فرعيه‌يه ذهنم شيمديلك جدّى متوجّه اولامييور. ذاتًا يانمده ده كتابلر اولماديغى گبى، وقتم ده يوقدر كه، مراجعت ايده‌يم. هم علماىِ إسلام او قدر تدقيقاتِ صائبه ياپمشلر كه، فروعاته دائر تدقيقاتِ عميقه‌يه إحتياجلرى قالمامش. أگر حقيقى إحتياج حسّ ايتسه ايدم، بويله فروعاته دائر مجتهدينڭ درين مأخذلرينه گيدوب، بعض بياناتده بولونه‌جقدم. بلكه ده، داها او نوع حقائقه مشغوليت زمانلرى گلمه‌مش، هر نه ايسه.

سزه بو دفعه سورۀِ فتحڭ آخرينه عائد و اونڭ مناسبتيله {اُولٰئِكَ مَعَ الَّذِينَ اَنْعَمَ اﷲُ عَلَيْهِمْ مِنَ النَّبِيِّينَ وَ الصِّدِّيقِينَ وَ الشُّهَدَاءِ وَ الصَّالِحِينَ} آيتنه دائر بياناتى و منهاجِ سنّت نامنده‌كى لمعه‌ده {اِلاَّ الْمَوَدَّةَ فِى الْقُرْبَى} سرّينه دائر محاكماتى، ناصل بولويورسڭز؟ قارداشڭ خسرو ايله سن، شيخِ گيلانى‌نڭ كراماتِ غيبيه‌سنڭ بتون پارچه‌لريله بر نسخه يازوب، خلوصى بگه گوندرسه‌ڭز ايى اولور. عاصم بگه ده اونلر بتون گيتمه‌ليدر.

باشده (غوثِ أعظمڭ تعبيريله بكر بك) بزم تعبيريمزله بكر آغا، أحمد خسرو، لطفى، رشدى، حافظ أحمد، قاين پدرڭ حاجى إبراهيم بك و سزائى بك اولارق عموم قارداشلريڭزه سلام، دعا ايدييورم. و مبارك و بختيار بدر الدينڭ باشندن اوپرم. او قرآنى اوقودقجه بڭا دعا ايتسين. اويله معصومڭ دعاسى إن شاء اﷲ حقّمزده مقبولدر. اونڭ والده‌سى اولان آخرت همشيره‌مه آيريجه دعا ايدييورم. بدر الدين گبى بر أولاد صاحبه‌سى اولديغندن تبريكه شاياندر. بدر الدينڭ اوقوديغى هر بر حرفِ قرآنڭ، اون ثوابدن طوت تا بيڭه قدر اُخروى ميوه‌لرى واردر. هم والده‌سنڭ دفترِ أعمالنه، هم خواجه و استادينڭ دفترِ أعمالنه دخى او ثوابلر قيد اولونور.