يگرمى يدنجى مكتوبڭ فقره‌لرى ايچنه درج ايتمك اوزره قارداشم عبد المجيدڭ خلوصى بگه يازديغى مكتوبڭ إشارت اولونان باش طرفى ايله آرقه‌سنده‌كى رأفت بگڭ مكتوبندن آلينان فقره‌لرى خسرو يازسين، صوڭره حافظ على‌يه گوندرسين.

عزيز، صدّيق، مدقّق، مراقلى قارداشم رأفت بك!

سزڭ گبى خوش‌صحبت بر قارداشمى، حقسز اولارق سؤال صورمامغه و سكوته دعوت ايدييوردم. چندان بو دعوتده معذورم، بلكه مجبورم. چونكه بوگون درت ساعت متماديًا كاتبى بكله‌دم كه، بر مكتوب يازاجغم، اولمادى. تا بن يگرمى دقيقه‌ده‌كى مسافه‌يه گيتدم. باغ صويى باشنده بولارق اويقوسز يورغون بولدم. اونى آلداتدم، آز بر ايشم وار ديدم. حالبوكه اون دقيقه ظن ايدوب، ايكى ساعت ضرورى يازيلر يازديردم. ذاتًا قفام ده يورغون و إستراحته محتاجدر

فقط رأفت گبى بر مشتاقى صوصديرمانڭ جزاسى اولارق بر طوقات ييدم. سنڭ بو هفته ايده‌جگڭ قولاى، لطيف سؤالڭه بدل؛ سڭركندلى آرقداشلريمز مُزعج، أسكى سعيدڭ قوّۀِ حافظه‌سنه حواله ايديله‌جك عجيب سؤاللرى صورديلر. ديدم كندى نفسمه مستحق اولدى، سن رأفتى ديڭله‌مدڭ، ايشته بونلرى ديڭله. حالبوكه اونلره جواب ويرمك لازم گلييور؛ چونكه اونلره، بويله مسئله‌لرده دينسزلر ايليشييورلر. مجبورى غايت مختصر و ناقص و قيصه جواب يازدم، فقط ينه رأفتڭ خاطرى ايچون يازدم. او جوابى، بوندن أوّل درت سؤاله جواب و مغيباتِ خمسه‌يه دائر صبرى أفندى و حافظ على‌نڭ سؤاللرينه دائر قيصه جوابى، خسرو ايله برابر اوقويڭز. مناسب گورورسه‌ڭز اوچى بردن، يا اون آلتنجى لمعه ويا يازيلميان اون دردنجى مكتوب مقامنه قائم ايديلسين. هم ياڭليش وار ايسه، تصحيح ايدرسڭز. چونكه، جوابلرڭ أصلى سنوحات اولمقله برابر تفصيلاتنده فكرم قاريشه‌رق ياڭليش ايده‌بيلير