ايكنجى سؤالڭز: أجلِ مبرم ايله معلّق، معلومڭز اولان تعبيرِ ديگرله أجلِ مسمّا و أجلِ قضا تعبير ايديلير.

اوچنجى سؤالڭز كه؛ سوزلر اوتوز اوچ، مكتوبات اوتوز اوچ، پنجره‌لر اوتوز اوچ، مجموعى طقسان طوقوز اولديغى گبى، عربى قطره رساله‌سنڭ باشنده بيان ايديلديگى اوزره، أڭ أوّل بو فقير قارداشڭزڭ حركاتِ فكريه‌سى نمازدن صوڭره اوتوز اوچ ”سبحان اﷲ“ و اوتوز اوچ ”الحمد ِﷲ“ و اوتوز اوچ ”اﷲ أكبر“ده‌كى مراتبه گوره طقسان طوقوز مجاهداتِِ فكريه و مقاماتِ روحيه‌ده‌كى تظاهرات و طقسان طوقوز أسماىِ حسنى جلوه‌سنه مظهريت سرلرينى، خيال ميال بر صورتده اوزاقدن اوزاغه حسّ ايديلمه‌سندندر كه، بو اوتوز اوچ مبارك عددى إختيارم اولميه‌رق چوق حركاتِ علميه‌مده و نشريه‌ده حكم ايدييور. باشده سنڭ درس آرقداشلرڭ و حاجى إبراهيم اولارق قارداشلريمزه سلام ايدييورم و مبارك خانه‌ڭده‌كى معصوملره دعا ايدييورم.