حافظ أحمد أفندى اون طوقوزنجى مكتوبى يازاجقدى، عجبا باشلادى مى؟ اوڭا چوق سلام ايدييورم. يازى خدمتى أهمّيتليدر، قاچ جهتده عبادتدر. سنڭ مبارك خانه‌ڭزده‌كى معصوملره دعا ايدييورم و معلوم درس آرقداشلريڭه چوق سلام ايدييورم. كچه‌جى شيخ مصطفى أفندى بعض رساله‌لرى يازييوردى. إن شاء اﷲ بويله قدسى خدمته اويله مبارك ذاتلر إشتراك ايدرلر. اوڭا ده بِالخاصّه سلام ايدييورم و دعاسنى ايسته‌يورم. حاجى إبراهيم أفندى و بدر الدينى، رأفتى تخطّر ايتدكجه أكثريتله اونلرى خاطرلايورم. اونلره ده بِالخاصّه سلام ايدييورم

صورديغڭ سؤاله أڭ قولاى و رخصتلى جواب سنڭ جوابڭدر. ملتقا شرحى دامادڭ و مراقى الفلاح ايكيسى ديمشلر: ايكى رمضان ايچون بر كفّارت كافيدر. متعدّد واقعه‌لره بر كفّارت كفايت ايدر. چونكه تداخل واردر. و {هُوَ الصَّحِيحُ} ديمشلر. حقيقت نقطۀِ نظرنده بو مسئله‌ده عزيمت وار، رخصت وار. عزيمت حالى، قوّتى مساعد ايسه، هر رمضان ايچون آيرى بر كفّارت وار. فقط رخصت جهتى، تداخل سرّينه بناءً متعدّد رمضان ايچون بر كفّارت فرض، آيرى آيرى كفّارت مستحب درجه‌سنده قالير. بو كفّارتده معناىِ عقوبتله معناىِ عبادت ايكيسى دخى مندرج اولديغى ايچون، هم كرهًا إجبار ايديلميه‌جك، هم تداخل ايدر