شيمدى چوق قونوشمغه وقتم يوقدر. حتّى فهرسته‌نڭ أڭ قولاى، أڭ مهمّ، أڭ آخر پارچه‌سنى دخى يازه‌مييورم. سنڭ درس آرقداشلرڭ، بِالخاصّه خسرو، بكر، رشدى، لطفى، شيخ مصطفى، حافظ أحمد، سزائى، محمدلر، خواجه‌لره سلام و مبارك خانه‌ڭده مبارك معصوملره دعا ايدييورم.

عزيز، صدّيق و زياده متحرّى و مستفسر قارداشم رأفت بك

سنڭ فائق ذكاڭ و دقّتڭ، صورديغڭ سؤاللرڭ چوغنه جواب ويره‌بيلديگى ايچون، مختصر جواب ويرييورم، گوجنمه. سنڭله چندان قونوشمق ايسته‌يورم، فقط وقتم مساعده‌سزدر. مسلمِ غيرِ مؤمن و مؤمنِ غيرِ مسلمڭ معناسى شودر كه: بدايتِ حرّيتده إتّحادجيلر ايچنه گيرمش دينسزلرى گورويوردم كه؛ إسلاميت و شريعتِ أحمديه، حياتِ إجتماعيۀِ بشريه و بِالخاصّه سياستِ عثمانيه ايچون، غايت نافع و قيمتدار دساتيرِ عاليه‌يى جامع اولديغنى قبول ايدوب، بتون قوّتلريله شريعتِ أحمديه‌يه طرفدار ايديلر. او نقطه‌ده مسلمان، يعنى إلتزامِ حق و حق طرفدارى اولدقلرى حالده مؤمن دگلديلر؛ ديمك مسلمِ غيرِ مؤمن إطلاقنه إستحقاق كسب ايدييورديلر. شيمدى ايسه فرنك اُصولنڭ و مدنيت نامى آلتنده بدعتكارانه و شريعت‌شكنانه جريانلره طرفدار اولديغى حالده؛ اللّٰهه، آخرته، پيغمبره ايمانى ده طاشييور و كندينى ده مؤمن بيلييور. مادام حق و حقيقت اولان شريعتِ أحمديه‌نڭ قوانيننى إلتزام ايتمييور و حقيقى طرفگيرلك ايتمييور، غيرِ مسلم بر مؤمن اولويور. ايمانسز إسلاميت سببِ نجات اولماديغى گبى، بيله‌رك إسلاميتسز ايمان دخى طايانامييور، بلكه نجات ويره‌مييور، دينيله‌بيلير