كوچك بر عالم اولان إنسانده قوّۀِ خياليه اولديغى گبى، بيوك بر إنسان اولان عالمده دخى بر عالمِ مثال وار كه؛ او وظيفه‌يى گورويور و حقيقتليدر. قوّۀِ حافظه لوحِ محفوظدن خبر ويرديگى گبى، قوّۀِ خياليه دخى عالمِ مثالدن خبر ويرر.

باشده خسرو، بكر بك، رشدى، لطفى، حافظ أحمد، سزائى، اوچ خواجه، اوچ محمد، خانه‌ڭزده‌كى اوچ معصوم و قاين پدرڭ اولارق اوراده‌كى قارداشلريمزه سلام و دعا ايدييورم.

سنڭ بنده بر استادڭ، بر قارداشڭ، بر دوستڭ وار. استاديڭى هر رساله ايچنده گوروب، گوروشورسڭ. قارداشڭى صباح آقشام درگاهِ إلٰهيده معنًا و خيالاً او، سنى دعا ايله گورديگى گبى، سن ده اونى او صورتله گوره‌بيليرسڭ. بنده‌كى دوستڭى گوره‌بيلمك ايچون، بورايه گلمكله زحمت چكمه. چونكه او دوستڭ زيارته لياقتى يوقدر. او بر، سز چوقسڭز. إن شاء اﷲ او گلير، سزى اوراده زيارت ايدر. {وَ لَيْسَ الذَّكَرُ كَاْلاُنْثٰى} آيتنه دائر شيمدى جواب ويرمگه وقتم مساعد دگل. صحّتنى بيلمييورم، فقط روايت ايديلييور كه: رسولِ أكرم عليه الصلاة والسلام فرمان ايتمش كه: ”اوغلان چوجغنى سَويڭز.“ ديمشلر: ”قيزلرى نه ايچون إستثنا ايتدڭ؟“ فرمان ايتمش كه: ”قيزلر كندى كندينى سَوْديررلر، اونلر فطرةً سَويمليدرلر.“ أوت قيز، شفقت و جمالڭ مظهرى اولديغندن، أركك چوجغندن داها زياده سَويلير. باخصوص بو زمانده أبويْن حقّنده قيزلر داها مباركدر. چونكه تهلكۀِ دينيه‌يه چوق معروض اولمييورلر.