عزيز، صدّيق، مدقّق قارداشم رأفت بك!

أوّلا: نوزادِ مباركڭ دنيايه گلمه‌سنى، سزڭ ايچون بر فالِ خير اولارق تبريك ايدييورم. إن شاء اﷲ {وَ لَيْسَ الذَّكَرُ كَاْلاُنْثٰى} سرّينه مظهر اولاجق. عاصم بك گبى سنڭ ده بر قيز أولادى دنيايه گلمه‌سى، مشربمزده أڭ مهمّ أساس شفقت اولديغى جهتيله و شفقت قهرمانلرى قيزلر اولديغندن و أڭ سَويملى مخلوق بولونديغندن، داها زياده تبريكه شايانسڭز. ظن ايدرم، بو زمانده أركك چوجقلرڭ تهلكه‌سى داها چوق. جنابِ حق اونى سزلره مدارِ تسلّى و اُنسيت و أويڭزه كوچك بر ملائكه حكمنه گتيرسين. ”رنگى گُل“ إسمى يرينه ”زينب“ اولسه داها مناسبدر.

ثانيًا: حكمت الإستعاذه‌نڭ، بسملۀِ شريفه‌نڭ سرلرينه دائر سنڭ و شريف أفندينڭ إفاده‌لريڭز قيصه‌در. تنقيد مى، تقدير مى آڭلاشيلمييور. ذاتًا مكرّرًا ديمشدم: هركس هر رساله‌نڭ هر مسئله‌سنى آڭلاماسنه محتاج دگل. نه قدر آڭلارسه كافيدر.

ثالثًا: عالمِ مثال، عالمِ أرواحله عالمِ شهادت اورته‌سنده بر برزخدر. هر ايكيسنه برر وجهله بڭزر. بر يوزى اوڭا باقار، بر يوزى ده ديگرينه باقار. مثلا: آيينه‌ده‌كى سنڭ مثالڭ صورةً سنڭ جسمڭه بڭزر. مادّةً سنڭ روحڭ گبى لطيفدر. او عالمِ مثال؛ عالمِ أرواح، عالمِ شهادت قدر وجودى قطعيدر. (حاشيه) عجائب و غرائبڭ مشهريدر، أهلِ ولايتڭ تنزّهگاهيدر.