بو حادثه دخى، عبد الرحمٰن حادثه‌سى گبى بر حجّتدر كه، بزه شيمديكى طرزِ حيات ياراماز. بزه بو دنياده داها صافى و عالى و قدسى بر حياتِ معصومانه إحسان ايديلديگندن اوڭا قناعت لازمدى. مرحوم عبد الرحمٰن گرچه موقّةً آلداندى، فقط إستانبولده رسالۀِ النور مقدّماتنه بيوك بر خدمتى وار. هم اوننجى سوز ايله تام قورتولدى، صوڭره گيتدى.

مرحوم فؤاد دخى، إن شاء اﷲ رسالۀِ النورڭ فيضيله ايماننى قورتارمش و مكتوبى دخى، سنڭ ديديگڭ گبى گوسترييور و سزه و خانَدانڭزه منسوبيتيله صميمى إفتخارى و قوّتلى إرتباطى، رسالۀِ النور جهتيله اولديغنى حسّ ايتدم.

بن سزه تعزيه ويرمك دگل، بلكه هم اونى هم سزى تبريك ايدرم كه؛ بو زمانڭ دهشتلى و ضلالتلى حياتندن قورتولدى، داها معصوم و چوق بولاشمه‌دن گيتدى. و سزه جنّتده لايق بر أولاد و {وِلْدَانٌ مُخَلَّدُونَ} سرّينه مظهر اولدى.

بن شيمدى‌يه قدر مرحوم ملا عبد اﷲ ايله برابر عبد الرحمانى و عبيدى أكثر دعالرمده ذكر ايتديگم گبى، مرحوم فؤادى دخى اونلر ايله برابر هر وقت ياد ايده‌جگم، إن شاء اﷲ.

أوت قارداشم، ديديگڭ گبى، فؤادڭ (رح) مكتوبى عينًا عبد الرحمانڭ (رح) مكتوبى مِثللو، رسالۀِ النورڭ بر شعلۀِ كرامتنى گوسترييور. يالڭز عبد الرحمانڭ غايت خالص و شيمديكى طرزِ حياتدن و تعبيرلرندن مبرّا، صافى إفاده‌سى اونده يوقدر. أگر دنياده قالسيدى، مغلوب اولمق إحتمالى واردى.