مبعوثِ عالم عليه الصلاة والسلام أفنديمز حضرتلرينڭ إنسانلرى حيرتده بيراقان و جزئى شعورى اولانه ايمانِ كامل بخش ايدن، فوق الحدّ و خارق العاده معنًا بيڭ أنواعِ معجزاتِ أحمديه‌يى إحتوا ايدن و پك عالى و عظيم قيمتى مثبت و مسلّم بولونان اون طوقوزنجى مكتوبڭ دردنجى جزئنى؛ نظر و توجّهِ فاضلانه‌لرنده‌ من غيرِ حدّ وكيللرى بولونديغم مُومٰى إليه خلوصى بك أفندى‌يه إرسال قيلنمق اوزره إستنساخه باشلامشدم

بيڭ معجزۀِ محمّديه مندرج اولان اون طوقوزنجى مكتوب، مقدّما دخى عرض ايديلديگى وجهله آرزومڭ فوقنده پك زياده علوى و نورانى مباحث و وقايعِ رسالت‌مآبيه‌يى بيان و مژده ايله روح و قلبِ عاجزى‌يى بهارِ عالم گبى گُل و گلستانلغه چويرمشدر. بو خصوصده قلبًا حسّ أيله‌ديگم طويغولردن متولّد و لازم العرض مدح و ثنايى غايت پارلاق بر طرزده عرض ايتمك أخصِّ أملم ايسه ده، مع الأسف سويله‌مكدن عاجز بولونديغمى بيان ايله إكتفا ايدييورم. يالڭز شو نقطه‌يى حسّ ايتدم كه: او وقايعده سز جسمًا دگلسه ده فقط روحًا، سرورِ كائنات أفنديمز حضرتلريله برابر ايديڭز تصوّر ايدييورم. زيرا او وقايعِ مذكوره‌نڭ كُنْيه‌سيله، موقعيله، عنعنه‌سيله قطعيًا مشاهده و اول وجهله نقل و تحرير بيورديغڭزه قانع و قائلم

اون آلتنجى مكتوبى آتابگه گيدركن گوتوردم. أكثرى نقطه‌لر بر قسم إخوانى آغلاتدى و عموجه‌زاده‌م زهدى أفندى، اون آلتى‌يى اوقوينجه، ”شيمدى‌يه قدر بيلمديگم و گورمه‌ديگم نورانى و پك كثرتلى سرورِ معنوى‌يى إحتوا ايدن بر پنجره بوگون قلبمه آچيلدى. شو پنجره‌دن حاصل اولان نتائجى يازمق إقتداريمڭ فوقنده ايسه ده، عونِ إلٰهى‌يه طايانه‌رق بر عريضه ايله عرض ايتمك أخصِّ أملمدر. نهايتسز سلام و حرمتلريمى تبليغه توسّطڭزى رجا ايدرم.“ ديديلر