سوزلر نامنده اولان بحرِ محيطِ نورده ايكى سنه‌يى متجاوز بر زماندن بَرى، سير و سياحتمڭ ثمره و نتيجه‌سنى گوروب بيلمك خصوصنده شيمدى‌يه قدر زمين و زمان مساعد اولماديغندن، سرمايۀِ تجارتمڭ نه درجه‌لره چيقديغنده؛ داها طوغريسى بر تجارت ايدينه‌بيلدم مى، يوقسه ايدينه‌مدم مى، متردّد و متحيّر ايدم.

حمدًا ﷲ بو شهرِ رحمت و مغفرتده، عنايتِ ربّانيه و معاونتِ پيغمبريه و هممات و دعواتِ استادانه‌لرى بركاتيله سرمايۀِ علميه‌’ِ أوّليۀِ بنده‌گانه‌مڭ يوزده طقسان طوقوز درجه يوكسلديگنى فهم ايتدم. او منابعِ علميه و تمثيلاتِ حقيقيه، مجلسلريمى او قدر تزيين و تنوير ايتمكده‌در كه، عرض ايتمكدن عاجزم. بشرڭ پك زياده آياغنى قايديران شو عصرده، غايتله خارقه و فوق الحدّ جهازات و مالزمه‌يى نشر ايدن نور فابريقه‌سندن، هر نوع تجهيزاتى آلمق فرض اولديغنى بيلوب، هر درلو ثنا و ستايشه بِحقٍّ سزا و لايق بولونان و هيچ بر صورتده ريايه حملى إمكانسز اولان مؤسّسه صاحبِ أعظمنه، نه درجه‌لرده ايفاىِ شكران و عرضِ منّتدارى أيله‌سه‌م، ينه حقّيله وظيفۀِ ذمّتمى أدا ايتمش اولاميه‌جغم.

چوقدن بَرى روحِ كمترانه‌مڭ صوڭ درجه مشتاق بولونديغى و هر بر كلمه‌سى برر ألماس مخزنى اولان شو يگرمى سكزنجى رسالۀِ پرنورلرينى، لَهُ الْحَمْدُ قرائت و إستنساخه موفّق اولدم. شو آلتون‌مثال حروفاتدن مركّب ألماس منبعنڭ درجۀِ قيمت و رغبت و أهمّيتنى عرض و إفاده خصوصنده (مبالغه اولماسين) ممكن اولسه ايدى، شو رسالۀِ قيمتدارينڭ حقائقِ نامتناهيسنى موضِّح و جامع بر چوق كلماتڭ وضع ايتديرلمه‌سنه چاليشه‌جقدم كه، حقيقت لايقيله إفاده ايديلسين. زيرا خالقِ عالم حضرتلرى، شو مكوّناتى خلق و ايجاد و هر برينى برر وظيفه ايله توظيف و أجلِ عالمڭ حلولنده، مسئوليت نقطه‌سنده بو دنياده عجز و فقر و ضعف و إحتياجنى فهم و إدراك ايده‌رك، قوانينِ أزليه و دساتيرِ ربّانيه‌يه إمتثال و إتّباع ايدنلره، شو موضوع بحث جنّت گبى بر نعمت ايله إعزاز ايده‌جك و على الخصوص جنّتده أڭ بيوك نعمت، جمالِ باكمالِ ربّانيه‌يى مشاهده و مشرّفيتِ عظما اولديغندن، شو فانى عالمده‌كى هر شى بِالنَّتيجه جنّته ناظر و حيران اولديغى و شو حقائقڭ منبعى اولان فرقانِ مبين و قرآنِ عظيمڭ أبوابِ متعدّده‌سنى فتح و أسرارِ گونا گوننه إطّلاع ايله درياءِ حقائقه طالمق هركسه ميسّر اولماديغندن، بش سؤال و بش جواب مفتاحِ حقيقيسيله او كنوزِ متنوّعه قپولرينى آچوب پك ياقيندن و كمالِ صراحتله گوستريلمسى جهتى، دگل بو عبدِ عاجزڭ قاصر عقلى، بلكه اولدقجه يوكسك ذكالره مالك اولانلرڭ بيله تقديرينه حقّيله شايان اولديغنى قائل و قانعم.