هله برنجى سوزده بسمله‌نڭ درجۀِ أهمّيتى و صورتِ تمثيليه‌سى شايانِ تقدير و حيرتدر. اوته‌دن بَرى هر كتابڭ إبتداسنده ”بسمله، حمدله، صلوله“نڭ ذكرينڭ وجوبى، خواجه أفنديلريمز طرفندن بيان ايديلمش ايسه ده، بو گبى نفسى إسكات ايده‌جك بر تمثيل ايشيديلمديگندن بو درجه ذهنده تقرّر و تمركز ايتمه‌مشدى. شو تمثيل، بسمله سوزى اولان برنجى سوزده نه قدر مصيب و معنيدار اولديغنى إنسان اولان تقدير ايدر.

اوچ كتابدن يگرمنجى سوزى ايلك دفعه اوقودم. حبلِ متينِ إلٰهى و قانونِ مبينِ ربّانى اولان قرآنِ عظيم الشانده، شو صوڭ عصرده وجوده گلن و فرنكلرڭ مدارِ إفتخارلرى بولونان تحت البحر، طيّاره وسائره گبى أشيايه، بيڭ اوچيوز كسور سنه مقدَّم إشارتله إفاده ايديلديگنى اوگرنه‌رك كتابِ مبينڭ ماضى و مستقبلدن ويرمكده اولديغى إخباراتِ غيبيه و صادقه و بياناتِ خارقه، دوست و دشمنى مفتون و حيرتلرده بيراقديغى جهتله، بر قات داها إعجازِ قرآنى إثبات و تأييد ايتمشدر. يگرمى اوچ و اوتوزنجى سوزلرڭ باش طرفلرندن اوچر، بشر صحيفه اوقويه‌بيلدم. مخزن و مدفنِ مجوهراته راست گلمش بر فقير گبى هانگى جوهرى آلاجغمى حريصانه دوشونويورم.