آلتون يالديزله يازيلماسى لازم گلن أثرِ عاليڭزده، رسولِ مجتبى عليه أكمل التحايا أفنديمز حضرتلرينه ديل اوزاتان خائنِ بى‌دين اولان ملحد خائنلرڭ قوروياسى ديللرينى، عنايتِ إلٰهى و روحانيتِ پيغمبرى و شريعت قلنجى ايله كسمگه موفّق اولديغڭز شو أثرِ برگزيده‌ڭزى جنابِ حق عندِ إلٰهيسنده و نزدِ پيغمبريده قبول أيله‌سين. شفاعتِ نبويه‌يه أفنديمى و فقيرى ده نائل أيله‌يوب، سنجاقِ محمّدى (ع‌ص‌م) تحتنده جمله‌مزى إخوانلريمزله برابر حشر أيله‌سين، آمين.

براقِ توفيق ايله حقائقِ سماواته راهِ عروجى إرائه و تفهيم ايچون، تنظيم و تصنيف بويوريلان و هر بر لمعۀِ علويه‌سى، عقلى و نقلى بيڭلر آيات و علائمِ ايمانى فوق الحدّ ايضاح و إثبات ايدن و بر مرقاتِ ايمان و بر مرآتِ واجب الوجود و المنّان اولان و سراىِ دارِ بقانڭ ألماس بر مفتاحى بولونان يگرمى ايكنجى بحرِ حقائقى عنايتِ إلٰهيه ايله إستنساخه موفّق اولدم.