مكرّرًا مطالعه و قرائت ايده‌رك، عرش قدر يوكسك أثرلريڭز حقّنده مطالعه سردينه، بر كلمه حتّى بر نقطه علاوه‌سنه كندمده جرئت و قدرت بولاماديغمدن طولايى، بو بابده بر مطالعه درمياننه إمكان گوره‌مييورم. يالڭز چوق يوكسك، جهان قدر قيمتدار مبارك أثرلرى اوقويوب، جهالتمز حسبيله إدراك ايده‌بيلديگمز قدر إستفاده و إستفاضه‌يه چاليشه‌رق مستفيد اولابيلمك بزم ايچون پك بيوك بر نعمتدر.

إشبو جهان‌قيمت أثرڭ مطالعه‌سنده ناصل بولديغمز إستفسار بيورولويور. دقائقِ حكمت و حقائقِ علميه ايله تزيين و ترصين ايديلمش اولان يوكسك أثر حقّنده بر مطالعه سرد ايتمك، بضاعه‌مڭ فوقنده‌در.

أفنديم! يگرمى بشنجى سوز، جنابِ حقّڭ فرمانِ مبينى اولان قرآنِ معجز البيان ايچون اويله بر وضوحِ أتمّى حاوى بر مُعرِّفِ حقيقيدر كه: بحرِ حقائقده سير و سياحت ايدن و خارجًا چليكله مجلاّ و مستحكم و داخلاً ألماس و عقيقله مزيَّن و مبرهن و منبعِ حقيقيسى اولان فرقانِ حكيم گبى، دائما گنجلگنى و رصانتنى، زينت و حُسننى تزييد و محافظه ايدن و هيچ بر وجهله أحكامِ ممدوحه‌سنه نقيصه گتيرمه‌ين، بر سفينۀِ سماويه‌نڭ محصولى اولوب، قلبلرى قشرلانه‌رق فلسفه‌نڭ چيقماز چيغيرلرينه صاپان غافل و عاصيلره شدّتله ضربۀِ مدهشه و مهلكه‌سنى چارپان او سوز، مطيعلره لطفِ دستِ معنويسيله، دنيوى و اُخروى نهايتسز مكافاتنى إحسان ايدن جنابِ حقّڭ، ذاتِ استادانه‌لرينه لطف بيورديغى و وهّاب إسمِ جليلندن طلوع ايدن نورڭ لمعه‌سيله ضيالانديروب حقائقِ إلٰهيه‌نڭ ذرّه‌لرينى بيله پيرلانطه‌لر گبى گوروب و گوسترن استاديمڭ حقائق دڭزنده سير و سياحتلرى أثناسنده إصابت ايدن موجه‌لر كه؛ يكديگرينى متعاقب هر بريسى باشلى باشنه بر معجزه حتّى بر قطره‌سى بيله ايجازيله إعجازينى گوسترديگنى گورديگمده ”ما شاء اﷲ“، ”الحمد ِﷲِ على نوُرِ الايمان و هداية الرحمٰن“ جملۀِ جليله‌سنى لسانمده ورد ايدييورم.