بحرِ معجزات، فخرِ كائنات أفنديمز حضرتلرينڭ شو سيسلى عصرده پاسلى روحلريمزى تنوير و تسرير ايدن و سائقِ حياتِ أبديه‌لرى بولونان اون طوقوزنجى مكتوبڭ بشنجى جزئنى آلارق، اوچنجيسنى إعاده ايتدم. فخرِ كائنات أفنديمزڭ معجزاتندن اولان پارمقلرندن صو آقيته‌رق اوردويه ايچيرمه‌سنه دقّت ايده‌رك درين بر تفكّره طالدم. او صيره‌ده قلمم بويا شيشه‌سنده ايدى. يازمق وظيفه‌مه موقّت بر فاصله ويره‌جكدم. قلممى طوتدم، مركّبى ايله يرنده قويمامق ايچون قلمده‌كى مركّب بيتنجه‌يه قدر بر ايكى كلام داها يازايم ده اويله بيراقه‌يم ديدم. باشلادم، ياريم صحيفه يازدم، قلمدن بويا كسيلمه‌دى. بونده‌كى حكمتى دوشوندم، قلم قورودى. صوڭره بر چوق دفعه‌لر قلمى دقّتله بويايه باتيره‌رق يازدم، تجربه ايتدم. ياريم سطر، نهايت بر سطره كافى گله‌بيلدى. بو ده خطيبِ بغدادى‌نڭ {فِى يَوْمٍ كَانَ مِقْدَارُهُ خَمْسِينَ اَلْفَ سَنَةٍ} سرّنده‌كى (حاشيه) تفكّرندن متحصّل واقعه‌يى آڭديرر بر تأكيدِ إعجازِ نبويدر، ديدم.

أوّلجه تقديم قيلينان عريضه‌لرمده‌كى تعبيرات و ألفاظِ تعظيميه‌م نه ايچون حق اولماسين؟ زيرا شو قيمتدار و أهمّيتِ نامتناهيه‌يى إحتوا و عالمه برقِ خاطف گبى سطوتِ معنويه و حقيقيه‌سنى أمثالى گبى إعلام و إعلان ايدن يگرمى آلتنجى مكتوبِ مرغوبى، يگرمى گوندن بَرى مختلف درجاتده منتسبينِ علميه مطالعه ايتدكلرى حالده، بوگون تصحيحنه لزوم گورولن و على التّعداد يگرمى سكز نقطه‌ده تعديل و علاوه بويوريلان نقاطِ مهمّه، كلمات و تعبيراتِ عاليه‌يى زائد ويا نقصان دييه‌بيله‌جك بر كيمسه چيقماسين و چيقمييور.

أوت شو عصرڭ أشخاصِ مضرّه‌سنه قارشى إعلان ايتمش اولديغى جهادِ معنويه‌ده مشاهده ايديلن موفّقيتِ فوق العاده‌نڭ، او گروهِ خَذَله و رَذَله‌يى إسكات و إلزام ايتديگنى، ذرّه قدر إنصافى و إذعانى و إنسانيتده حظّى اولانڭ إقرار و إعتراف و تصديق ايتمه‌سى، وجيبه‌دن اولديغى وارستۀِ ريب و ظنوندر.