گوڭل ايستر كه، همان رسالة النورڭ عمومنى يازيويرسه‌م ده ماملكمده بولونان درِّ يكتالرى إستعدادم نسبتنده مطالعه‌يه باشلاسه‌م

اوتوز برنجى ألماس كلّياتنى عونِ حق و عنايتِ أكرميلريله ايكى گون أوّل إكماله موفّق اولدم. أحمد قارداشمه عائد دركنارى تفهيم ايتدم. برآز اوقور و اوننجى سوزى ايسته‌يور، فقط بو سوز قيمتِ معنويه إعتباريله موجوداتدن آغيردر. إعجازِ قرآنڭ ايكنجى جزئنى همان ختام بولديرمق اوزره‌يم. فقط مشتاق بولونديغم اوتوز ايكنجى سوزى دخى لطف بويوراجق اولورسه‌ڭز، حاصل اولاجق ممنونيتمى بر وجهله عرض ايتمكدن عاجز قالاجغم. چونكه بو گبى قيمتدار و معنيدار أثرلرى ايشيتدكدن صوڭره، گورمك إشتياقى گيتدكجه آرتييور و بو طبيعتدن بر درلو كنديمى منع ايده‌مييورم

بو دفعه إستنساخنه موفّق اولديغم نورلى يگرمى طوقوزنجى سوزده، ملائكه دڭزلرنده سفائنِ كبريايه ياپيشه‌رق سيران ايدركن و بشرڭ خطا-صواب ايشلديگى أفعالى، قطعى اولارق عمومى يوقلاما دفترِ كبيرنده اوقونه‌جغنى، نفع و ضرر هيچ بر شيئڭ مكتوم بيراقيلميه‌جغنى شدّتله إخطار ايدن، بقاءِ روح عالمنى تماشا ايدركن؛ مطلبِ أعلا و مقصدِ أقصا اولان بعث و محكمۀِ كبرانڭ أحكامنى قبل الوقوع مقامِ إستماعده ديڭلركن و بِالخاصّه ”مدارلر“ نردبانلرندن عالى مقاملره معنوى صعود ايدركن، هله اوننجى مدار و اوچنجى، دردنجى مسئله‌لرده دڭز دالغيجلرى گبى درياىِ معنوياتده دالوب يوزركن، او قدر أنوارِ حقائقِ كبريايه و أذواقِ لطائفِ عليايه مستغرق اولدم كه، عرض و إفاده‌دن عاجزم