بارلا لاحقه‌سى | يگرمى يدنجى مكتوب و ذيللرى | 57
(26-437)
عزيز قارداش! زمان اولور كه هر شى، هركس، هر معامله، قلبى اينجيتييور. فقط ايشته ترياقى:

فَاِنْ تَوَلَّوْا فَقُلْ حَسْبِىَ اﷲُ لاَ اِلٰهَ اِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ

هر زمان سويله‌يورم: بز بو فانى حيات ايچون دوستلق ياپمييورز. بو قيصه حياته وداع ايتمك، عنديمزده و إعتقاديمزده أبدى بر حياتڭ مقدّمه‌سيدر. اويله ايسه متأثّر اولميه‌لم. نيجه كه، او حياته باشلامادق. ايشته مراسله ايله مواصله‌يى تأمين ايده‌لم. اللّٰهه گووه‌نه‌لم، اوندن مدد ديله‌يه‌لم.


َالْحَمْدُ ِﷲِ الَّذِى هَدٰينَا لِهٰذَا وَمَا كُنَّا لِنَهْتَدِىَ لَوْلاَ اَنْ هَدٰينَا اﷲُ لَقَدْ جَاءَتْ رُسُلُ رَبِّنَا بِالْحَقِّ ❊ اَللّٰهُمَّ صَلِّ عَلٰى سَيِّدِنَا مُحَمَّدٍ مِنَ اْلاَزَلِ اِلَى اْلاَبَدِ عَدَدَ مَا فِى عِلْمِ اﷲِ وَ عَلٰى اٰلِهِ وَ صَحْبِهِ وَ سَلِّمْ

خلوصى

***********************

(صبرينڭ يگرمى برنجى و يگرمى ايكنجى سوزلرى يازديغى وقت يازديغى مكتوبڭ بر فقره‌سيدر)

بِالعموم رسالات الأنوار هر برى آيرى آيرى موضوعلرده، حدّ و حسابه گلمه‌ين مشكللرى حلّ ايتمه‌لريله برابر بنده‌ڭز شويله تصوّر ايدييورم كه: نور درياسندن نوش ايتمك ايسته‌ين بر كيمسه، برنجى و يگرمى برنجى و يگرمى ايكنجى سوزلرى آلسه، ديگرلرينه ألى يتيشمزسه دخى مرضِ قلبى‌يى دفع و رفعه، روحى تنوير و تسريره كافى بولونديغى مشهود و مسلّمدر. زيرا برنجى سوز توحيد مفتاحيدر. يگرمى برڭ برنجى شقّى ده مرقاتِ جنّتدر. ايكنجى شقّى ده أمراضِ قلبيه‌نڭ تداويسى ايچون نظيرسز بر شفاخانۀِ أجزادر. إكسير علاجلريله بِلا إستثنا هركسده بولونان وسوسه مرضنى تداوى و قلع ايدر. قلب و روحده قرآنِ حكيمڭ أبدى و نامتناهى فيوضات و أنوارندن گلن روضاتِ إنشراحيه‌يى كشاد ايله سعادتِ أبديه‌يه ايصال ايده‌جك بر راهِ نجات و سلامتدر. يگرمى ايكى ايسه؛ برهانلريله، لمعه‌لريله إنسان اولانڭ عقائدِ دينيه‌سنى تحكيم و ترصينه أمثالسز بر رهبر بولونديغنى عرض ايدرم أفنديم.


صبرى
سس يوق

بارلا لاحقه‌سى