شو قدر عرض ايده‌بيله‌جگم كه؛ بو برهانى، سندى، شهودى والحاصل كافّۀِ أسبابِ ثبوتيه‌سى أصلنده مندرج و مشتمل بولونان قيمتدار أثر، عموم رسالۀِ نور و مكتوبات النورڭ گونش‌مثال إعجازلرى، عالملرى حيرتده بيراقان كرامتلرى، دوست و دشمنڭ إعتراف و تقديرينى قزانان آثارِ سابقۀِ نورانيه‌نڭ نه قدر گوزللكلرى و مزيتلرى وارسه، صانكه بو قسمده إجتماع ايتمش. و ياخود شويله دييه‌بيله‌جگم كه، هر نه زمان نورلردن بر رساله گورسه‌م، بو گبى وياخود داها زياده بر ذوقِ حقيقى و سرورِ نامتناهى گورويورم. شو حالده بو عجيب محسوسات و مشهودات، آنجق نورلره عائد و منحصر بر إعجاز، كذالك نورلره مخصوص بر كرامتيدر ديمكده، أهلِ ايمانجه كامل بر قناعت موجود بولونه‌جغنه أمينم. بِالخاصّه توافقاتى، تفسيراتى گوستريله‌رك تحريرى مصمّم و منوى بولونان قرآنِ عظيم الشانى، عموم أهلِ ايمان و توحيد كمالِ خوٰاهشله و نهايتسز حرمتله قارشيلايه‌جقلرى، بداهتده اولديغى گبى؛ بر چوق كيمسه‌لرڭ ده، آخر عمرلرنده يڭيدن اوقومغه شوق و غيرت گوستره‌جكلرى، بر إحتمالِ قويدر. داها نيجه أمثالى نامسبوق آثارڭ وجوده گتيريلمسنى، بتون روحمله ديلر و جنابِ منعمِ حقيقيدن موفّقيتلر تمنّى أيلرم أفنديم.

شو ايكى گيجه‌دن إغتنام ايده‌بيلديگم وقتلرده، يگرمى طوقوزنجى مكتوبڭ برنجى قسمنى إستنساخ ايده‌رك، كندى نسخه‌مى على أفندى‌يه و أصلنى ذاتِ استادانه‌لرينه إعاده و تقديم ايدييورم. شو بر آيدن بَرى، روحلريمز آتشه معروض چمن گبى يانيق، كوسكون، صولغون بر وضعيتده اولوب؛ حتّى أكثر آرقداشلرله، بو مسئله حقّنده نه خطِّ حركت تعقيب ايده‌جگمزى مكتوبله مخابره و مشاوره‌يه باشلادق. و بو طرفده استادِ أعظممزه أڭ ياقين بنده‌لرى اولديغم ايچون، شفاهًا ويا تحريرًا بو بابده معروضاتده بولونمق أملنده ايكن؛ بو دردلره برر إكسير، علاج و جوابِ شافى اولان يگرمى يدنجى سوزى بر قات داها موضَّح و اولدقجه شموللى بر جوابِ عالى‌يى بزلره إحسان ايدن و قيصه‌جق جمله‌سى نامتناهى حقائقِ معانى‌يى جامع بولونان، بحرِ محيطِ كبير تعبيرينه ماصدق اولان هر بر جملۀِ قرآنيه شو قسمده بِالخاصّه بشنجى، سكزنجى و طوقوزنجى نكته‌لرده عصرڭ قورو قفالى، مفلس، فلسفه‌جى شيطانلرينى گمله‌مش، إسكات ايتمش، داها طوغريسى بتون بتون إلزام و روحلريمزى ده تنوير و تسرير و تسلّى ايتمشدر.