استادِ معزّزم! قرآنِ عظيم الشانڭ نه درجه‌لرده زنگين بر خزينۀِ رحمتِ إلٰهيه بولونديغى وارستۀِ عرض اولوب، او خزينۀِ قدسيه‌نڭ محتوى بولونديغى أنواع درلو ألماس و پيرلانطه‌لرى چيقارتمق و بِالوسيله بزم گبى محتاج اولانلره ده ويرديرمك خصوصنده، نورلر كلّياتنڭ أكثريسنده تام بر محرّكلك وظيفه‌سنى درعهده ايدن استادِ ثانى خلوصى بك أفنديمى، تشبيه و تعبيرى جائز ايسه، ساعتجيلرده بولونان ييلديزوارى سكز اون آغزلى ساعت آناختارلرينه بڭزه‌تييورم كه؛ او متعدّد آغزلى آناختار، عالمده موجود هر ساعتى تحريك ايدر، ايشله‌دير. مُومٰى إليه بك أفنديم ده، عينًا او حالده اولوب، أمثالى گورولمه‌مش و طويولمامش بر چوق مسائلِ مهمّۀِ حقيقيه‌يى حضرتِ قرآن و دلاّلِ قرآندن ايسته‌يور.

شو عصرده خزينۀِ خاصّۀِ معنويه‌نڭ خزينه‌دارِ بى‌نظيرى ده، او قيمتدار سائلنه أڭ قيمتدار و روحه تام بر غدابخش موائدِ معنويۀِ قرآنيه ايله إعزاز و إكرام ايدركن او حلقه‌يه لايق و مستحق اولماديغم حالده، فقير ده غداىِ روحانيمى آرامسز آلنجه؛ او موائدى إحسان ايدنه ده، گتيرنه ده، ايسته‌ينه ده حدسز مديونِ شكران قالييورم. بو دفعه‌كى آلديغم لطفنامۀِ أكرميلرنده، گوجنمه‌سنى حاضر فرض ايده‌رك مكتوبله مخابره ايتمييورم، بيوريلييور. بو خصوصده قلب و روحمه ”نه ديرسڭز؟“ ديدم. ”اَسْتَغْفِرُ اﷲ، صدهزار اَسْتَغْفِرُ اﷲ. بز ئولمشدك، لَهُ الْحَمْدُ بزه تازه حيات بخش ايديلدى. گوجنمگه، هيچ بر جهتله حقّمز يوق. وظيفه‌مز اولان دعايه دوام و تشكّر بورچلى‌يز.“ جوابِ حق گويانه‌سنى روحمدن آلدم