هم اوچ مسئله وار: برى حيات، برى شريعت، برى ايماندر. حقيقت نقطه‌سنده أڭ مهمّى و أڭ أعظمى، ايمان مسئله‌سيدر. فقط شيمديكى عمومڭ نظرنده و حالِ عالم إلجاآتنده أڭ مهم مسئله، حيات و شريعت گورونديگندن او ذات شيمدى اولسه ده، اوچ مسئله‌يى بردن عموم روىِ زمينده وضعيتلرينى دگيشديرمك نوعِ بشرده‌كى جارى اولان عادت اللّٰهه موافق گلمديگندن، هر حالده أڭ أعظم مسئله‌يى أساس ياپوب، اوته‌كى مسئله‌لرى أساس ياپميه‌جق. تا كه ايمان خدمتى صفوتنى عمومڭ نظرنده بوزماسين و عوامڭ چابوق إغفال اولونابيلن عقللرنده، او خدمت باشقه مقصدلره آلَت اولماديغى تحقّق ايتسين.
    هم يگرمى سنه‌دن بَرى تخريبكارانه أشدِّ ظلم آلتنده او درجه أخلاق بوزولمش و متانت و صداقت غائب اولمش كه، اوندن بلكه ده يگرميدن بريسنه إعتماد ايديلمز. بو عجيب حالاته قارشى، چوق فوق العاده ثبات و متانت و صداقت و حميتِ إسلاميه لازمدر؛ يوقسه عقيم قالير و ضرر ويرر.
    ديمك أڭ خالص و أڭ سلامتلى و أڭ مهم و أڭ موفّقيتلى خدمت، رسالۀِ النور شاكردلرينڭ دائره‌لرى ايچنده‌كى قدسى خدمتدر. هر نه ايسه... بو مسئله شيمديلك بو قدر يتر.
    عموم قارداشلريمزه برر برر سلام و بو أيّامِ مباركه‌ده دعا ايدرز. و مقبول دعالرينى، گله‌جك أيّام و ليالئِ مباركه‌ده ايسته‌يورز.
    الحقّ، طاهرينڭ ده لمعات هديه‌سنى پك چوق قيمتدار گوردك. إن شاء اﷲ بو حواليده اوڭا چوق ثواب قزانديره‌جق، تام بر لطفيدر. اﷲ موفّق أيله‌سين.
* * *
    عزيز صدّيق قارداشلرم!
    أوّلا: سزڭ ليلۀِ برائتڭزى و گله‌جك رمضانڭزى تبريك ايدر و بو گله‌جك ليلۀِ قدرى حقّڭزده و حقّمزده بيڭ آيدن داها خيرلى اولماسنى و دفترِ أعمالمزه بويله گچمه‌سنى جنابِ حقدن نياز ايدييورز و بويله‌جه، بايرامه قدر {اَللّٰهُمَّ اجْعَلْ لَيْلَةَ قَدْرِنَا فِى هٰذَا الرَّمَضَانَ خَيْرًا مِنْ اَلْفِ شَهْرٍ لَنَا وَ لِطَلَبَةِ الرَّسَائِلِ النُّورِ الصَّادِقِينَ} دعاسنى ايتمگه نيت ايتدك.