هم سزڭ ايكى معجزه‌لى قرآنى بزلره بو مبارك آيلرده گوندرمڭز، إن شاء اﷲ او درجه مدارِ بركت و ثواب و حسنات و فتوحات اولاجق كه؛ حقّمزده بو رمضانڭ هر بر گونى بر ليلۀِ قدر حكمنه گچه‌جگنى رحمتِ إلٰهيه‌دن اُميد ايدرز.
    شيمديدن بز تدبير ايتدك كه: ايكى قرآنى، رسالۀِ النورڭ بوراده‌كى خاص طلبه‌لرى رمضانِ شريفده، هر برى هر گونده بر جزئنى سزڭ ايله برابر اوقومق ايله، رمضانڭ هر گوننده بر ختمۀِ قرآنيه اولارق، معنوى و چوق گنيش بر مجلسده، إسپارطه و قسطمونى‌يى إحاطه ايدن بر دائره‌ده حلقه طوتان رسالۀِ النور طلبه‌لرينڭ و او دائره‌نڭ مركزنده سزلر بولونمق جهتيله رسالۀِ النور شاكردلرينڭ أطرافڭزده اولارق؛ نقشىده ختمۀِ خواجه‌گان طرزنده، فقط چوق بيوك بر مقياسده رسالۀِ النورڭ بتون شاكردلرى معنًا حاضر و او دائره‌ده بولنويور نيتيله، تصوّرى ايله اوقونمق، او قدسى ختمه‌يى ياپمق، جنابِ حقّڭ رحمتندن توفيق نياز ايدرز.
    ثانيًا: حاجى حافظڭ صاو كوينڭ قهرمان طلبه‌لرينڭ فوق العاده خدمتلرى، اورالرده سببِ تشويق و مدارِ غيرت و نمونۀِ إمتثال اولديغى گبى، بو حواليده دخى اونلرڭ او خارق العاده سعى و غيرتلرى، فوق العاده حسنِ مثال و نمونۀِ غيرت اولارق أهمّيتلى بر إنتباه و إشتياقه سببيت ويرمش. قهرمان خسروڭ اونلره دائر مكتوبلرى، مبارك نسخه‌لر گبى، تنبللك، لاقيدلق خسته‌لقلرينه مبتلا اولانلره شفا اولور، أللرده گزر.
    ثالثًا: سزڭ بورايه گلن قيمتدار مكتوبلريڭزى لاحقه‌يه يازمشز، فقط بعض كلمه‌لرى طىّ ايتدك. مفرطانه حسنِ ظندن گلن جمله‌لرى تعديل ايتدك، گوجنمه‌يڭز.
    رابعًا: إسلام‌كويى، قله‌اوڭى اورته‌سنده اولان و صدّيق صبرى و لطفى گبى طلبه‌لرى يتيشديرن آتابگ قريه‌سى، چوق دفعه خاطريمه گلييوردى. ”عجبا بو كوى نه‌دن گرى قالدى، سوندى؟“ دييه دوشونوب متأثّر اولويوردم. فقط جنابِ حقّه حدسز شكر اولسون كه؛ طاهر و عبد اﷲ چاوش او أنديشه‌مى تماميله إزاله ايتديلر، بيوك بر تسلّى بڭا ويرديلر. حتّى طاهرڭ بو دفعه بزه هديه ايتديگى لمعه‌لر و يدنجى شعاعى بر جلد ايچنده جلد ايتدكدن صوڭره مطالعه ايتدم. او طاهرده، بر خسرو، بر لطفى، بر عاصم گوردم. جنابِ حق اوندن و سزلردن أبديًا راضى اولسون. اونڭ او نسخه‌سى، بوراده چوق ايش گوره‌جك إن شاء اﷲ.