عزيز، صدّيق، مبارك، قهرمان قارداشلرم!
    أوّلا: بو مبارك رمضانده إشتراكِ أعمال دستورِ أساسيله، هر بر خاص قارداشمزڭ قرق بيڭ ديلى بولنان بر ملائكه حكمنده، قرق بيڭ ديللر ايله، يعنى قارداشلرڭ عددنجه معنوى ديللرى ايله ايتدكلرى و ايده‌جكلرى دعالر، رحمتِ إلٰهيه نزدنده مقبول اولماسنى او لسانلر عددنجه، جنابِ أرحم الرّاحميندن نياز ايدييورز. بو ماهيتده‌كى رمضانڭزى تبريك ايدييورز.
    ثانيًا: بو دفعه‌كى متعدّد تأثيرلى و سرورلى و مژده‌لى مكتوبلريڭزه قارشى، بر كتاب قدر جواب ويرمك لايق ايكن، وقتڭ مساعده‌سزلگى ايله قيصه جوابمدن گوجنمه‌يڭز. أڭ باشده، قهرمانلر ياتاغى اولان صاوه كوينڭ أهمّيتلى بر طلبه‌سى اولان أحمدڭ مكتوبنده اويله بر مسئله گوردم كه، بنى سُرور ياشلريله آغلاتديردى.
    جنابِ حقّه يوز بيڭلر شكر اولسون، رسالۀِ النورڭ تمام قيمتنى، او كويڭ مبارك والده‌لرى و خانملرى تمام آڭلامشلر. او مبارك خانملرڭ و قيمتدار و خالص آخرت همشيره‌لريمڭ، رسالۀِ النورڭ إنتشارينه گوستردكلرى فداكارلق، بنى و بزى كمالِ سروردن آغلاتديردى.
    ذاتًا رسالۀِ النورڭ مسلگنده‌كى أڭ مهم بر أساسى، شفقت اولديغندن و شفقت معدنلرى ده خانملر اولديغندن، چوقدن بَرى بكلردم كه، قادينلر عالمنده رسالۀِ النورڭ ماهيتى آڭلاشيلسين. ِﷲ الحمد بو حواليده ده، بو ياقىنده أرككلردن زياده بر إشتياق و فعاليتله بوراده‌كى خانملر تام چاليشييورلر؛ صاولى مباركلرڭ همشيره‌لرى اولدقلرينى گوسترييورلر. بو ايكى تظاهر بو زمانده بر فالِ خيردر كه؛ او شفقت معدنلرنده رسالۀِ النور پارلايه‌جق، فتوحات ياپه‌جق.