قارداشلرم! بو حادثه مناسبتيله رسالۀِ النورڭ تام مطابق چيقان بر إخبارِ غيبيسنى بيان ايدييورم:
    خسرو و خلوصى و رشدى و رأفت گبى رسالۀِ النورڭ چوق شاكردلرى، مسلكِ عسكريه و بو ايكنجى حربِ عموميه‌يه مناسبتدار بر صورتده گيرملرينى و ايكنجى بر حربِ عمومى اولاجغنى و إشتراكمزى يعنى طلبه‌لرڭ إشتراكنى آلتى يدى سنه أوّل خبر ويرمش. چونكه يگرمى سكزنجى لمعه اولان ايكنجى كرامتِ عَلويه‌نڭ ايكنجى أماره‌ده {فَيَا حَامِلَ اْلاِسْمِ} بحثنده {فَقَاتِلْ وَلاَ تَخْشَ} برابر اولسه، بيڭ طوقوز يوز قرق (١٩٤٠) كسور اولويور. اَﷲُ أَعْلَمُ، او تاريخده بر حربِ عمومى‌يه إشتراكمزى يعنى أسكى متّفقله دگل، بلكه طرفدارانه اونڭ خصميله إشتراكه إشارت ايدييور دييه خبر ويرمش. ايشته شيمدى عين تاريخدر كه، رسالۀِ النورڭ أركانِ مهمّه‌سى إشتراك ايدييور.
    قارداشلريمزه برر برر سلام ايدرز. حلمى، فيضى، نظيف، أمين سزلره سلام و عرضِ حرمت ايدرلر.
اَلْبَاقِى هُوَ الْبَاقِى
سعيد النورسى
* * *
بِاسْمِهِ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ  ❊  اَلسَّلاَمُ عَلَيْكُمْ وَ رَحْمَةُ  اﷲِ
وَ بَرَكَاتُهُ بِعَدَدِ حَاصِلِ ضَرْبِ عَاشِرَاتِ دَقَائِقِ لَيْلَةِ الْقَدْرِ فِى حُرُوفِ الْقُرْاٰنِ
    عزيز، صدّيق قارداشلرم!
    أوّلا: بتون روح و جانمله مبارك رمضانڭزى تبريك ايدرم. و او مبارك شهرده ايتديگڭز دعالرڭ، جنابِ حق ياننده مقبول اولماسنى أرحم الرّاحميندن نياز ايدرم.
    ثانيًا: بو سنه‌كى رمضانِ شريف هم عالمِ إسلام ايچون، هم رسالۀِ النور شاكردلرى ايچون غايت أهمّيتلى و پك چوق قيمتليدر. رسالۀِ النور شاكردلرينڭ إشتراكِ أعمالِِ اُخرويه دستورِ أساسيه‌لرى سرّنجه، هر بريسنڭ قزانديغى مقدار، هر بر قارداشلرينه عين مقدار دفترِ أعمالنه گچمه‌سى او دستورڭ و رحمتِ إلٰهيه‌نڭ مقتضاسى اولمق حيثيتيله، رسالۀِ النور دائره‌سنه صدق و إخلاص ايله گيرنلرڭ قزانجلرى پك عظيم و كلّيدر. هر برى، بيڭلر حصّه آلير. إن شاء اﷲ أموالِ دنيويه‌نڭ إشتراكى گبى إنقسام و تجزّى ايتمه‌دن هر بريسنه عين عمل دفترينه گچمه‌سى؛ بر آدمڭ گتيرديگى بر لامبه، بيڭلر آيينه‌لرڭ هر بريسنه عين لامبه إنقسام ايتمه‌دن گيرمه‌سى گبيدر. ديمك رسالۀِ النورڭ صادق شاكردلرندن بريسى، ليلۀِ قدرڭ حقيقتنى و رمضانڭ يوكسك مرتبه‌سنى قزانسه، عموم حقيقى صادق شاكردلر صاحب و حصّه‌دار اولمق، وسعتِ رحمتِ إلٰهيه‌دن چوق قوّتلى اميدوارز.