إسپارطه‌ده‌كى عزيز قارداشلريمزه!
    استاديمزڭ خسته‌لغى حقّنده‌كى مشهوداتمزى عرض و استاديمزڭ كسبِ عافيتنى سزلره مژده ايتمك ايسته‌يورز.
    رمضانِ شريفده بش گون صومِ وصال ايچنده غدا اولارق، أكمكسز محلّبى اوچ قاشق و بش آلتى قاشق ده صوغوق يوغرتدن. اوچنجى گيجه، ياريم قاشق محلّبى و دردنجى گيجه إفطارده صولى شهريه‌دن بش قاشق، سحورده ينه او شهريه‌دن و يوغرتدن اوچ درت قاشق، صو صاييلمامق شرطيله شهريه‌دن بش درهم، يوغرت سوزولسه اون درهم، محلّبى صوسز آلتى يدى درهم؛ بشنجى گيجه‌ده، دانه‌سز گبى غايت خفيف شهريه بش آلتى قاشق، سحورده آلتى يدى قاشق پرنج چورباسى، مجموعى اوتوز درهم (٩٦ غرام) غدا ايله بش گون صومِ وصالى، تراويح نقصان اولارق سائر وظيفه‌لرڭ ياپيلماسى، رسالۀِ النور شاكردلرينه إحاطه ايدن عنايتڭ خارقه‌لرندن بر كرامتنى گوردك.
    استاديمزدن هيچ گورمديگمز ايكيمز يعنى أمين، فيضى؛ بارلا، إسپارطه سليمانلرى گبى اينجه‌دن اينجه‌يه خسته‌لق (حاشيه) حدّتلرينى تحريك ايتمه‌مك ايچون إحتياط ايده‌مديگمزدن، شدّتلى حدّتنى گوردك. بو خسته‌لقده ينه أثرِ رحمتدر كه؛ هيچ خاطر و خياله گلمه‌ين عشرِ آخرڭ غايت مهم گيجه‌لرنده، استاديمزڭ تام ايفا ايده‌مديگى وظيفه‌سى يرنده بو حواليده هر بر شاكرد، كندى خصوصى چاليشماسندن باشقه، بر ساعتى استادى حسابنه رسالۀِ النورڭ شاكردلرينڭ مجاهدۀِ معنويه‌لرينه إشتراك و اونلرى هدف ايدوب اونلرڭ دفترِ أعمالنه گچمگه، عين استاد گبى چاليشمغه باشلاديلر. ديمك استاد يرنده اونڭ بر قاچ ساعت چاليشمه‌سنه بدل، پك چوق ساعتلر عين وظيفه‌يى گورمه‌يه باشلاديلر. حتّى استاديمز دييوردى: أهمّيتسزلگمله برابر إسپارطه حواليسنده قارداشلريمزڭ أعمالِِ اُخرويه‌سنه بر مدار، بر مهيّج حكمنده بنم قصورلى چاليشمام كافى گلمه‌يوردى؛ جنابِ حق رحمتيله، بو خسته‌لق وسيله‌سيله بر شخصِ معنوى و قوّتلى بر مدار اولاجق بو تدبيرى إحسان ايتدى، جزئيتدن كلّيته چيقاردى.