بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    عزيز، صدّيق، مبارك قارداشلرم و خدمتِ قرآنيه‌ده چاليشقان و قوّتلى آرقداشلرم و طريقِ حقده و برزخ سياحتنده و آخرت يولنده نورانى يولداشلرم!
    سزڭ بايرامڭزى، ليلۀِ قدرڭزى، رمضانِ شريفده مقبول دعالريڭزى بتون روح و جانمله تبريك و تسعيد ايدييورم. جنابِ حق بو بايرامڭ سرورينى، حقيقى و گنيش و عمومى سروره مقدّمه و وسيله أيله‌سين، آمين.
    ثانيًا: سزڭ بو مبارك بايرامڭ هديه‌سى اولارق گوندرديگڭز نورلى قلم هديه‌لريڭزى او قدر قيمتدار گورويورم كه، تعريف ايده‌مم. جنّت الفردوسده آبِ كوثر دستيلرى گبى، كمالِ إشتياق و شكرانله و سرورلى گوز ياشيله قبول ايدوب باشمه قويدم. بويله ألماس قيلنج گبى قلملرى و حقيقت قهرمانلرينى رسالۀِ النوره إحسان ايدن جنابِ حقّه حدسز حمد و شكر ايدرم.
    سزلره ده او مبارك كتابلرڭ، يازيلرڭ هر بر حرفنه مقابل جنابِ أرحم الراحمين اون حسنه إحسان أيله‌سين، دييه نياز ايدييورم.
    حقيقةً خسروڭ إنفكاكى بنى چوق متأثّر ايتمشدى. فقط طاهرى، او پارلاق قلميله بنم او تأثّراتمى إزاله أيلدى. او بتون أفرادِ عائله‌سيله، پدر و والده‌سيله رسالۀِ النورڭ خاص طلبه‌لرى ايچنده هر وقت حصّه‌دار اولاجقلردر.
    هم بو طاهرڭ يوزندن بوگوندن إعتبارًا آتابگ ده، إسلام‌كويى، صاوه كويى، قله‌اوڭى قريه‌لرى گبى نورس قريه‌سنه آرقداش اولوب عموم معنوى قزانجمزه حصّه‌دار اولدى.
    إسپارطه‌نڭ حافظ عليسى (كاتب عثمان) الحقّ ايكنجى بر خسرو اولديغنه، بنم ده قناعتم گلدى. جنابِ حق اونى و محمد زهدى گبى چوق فداكارلرى و رسالۀِ النورڭ حقيقى صاحبلرينى إسپارطه‌يه إحسان أيله‌سين، آمين