يالڭز بو قدر وار كه، إسپارطه حواليسنده يوزر گنج سعيدلر و خسرولر يتيشمشلر. بو إختيار و ضعيف سعيد، دنيادن كمالِ إستراحتِ قلبله وداع ايتمگه حاضردر. و بِالخاصّه مهم بر مدرسۀِ نوريه اولان صاوه كوينڭ باشده حاجى حافظ اولارق أحمدلرى، محمدلرى، حتّى محترم خانملرى (طاهرڭ رفيقه و كريمه‌لرى گبى) و معصوم چوجقلرى رسالۀِ النورله مشغول اولمه‌لرينى دوشوندكجه بو دنياده جنّت حياتنڭ معنوى بر نوعنى ذوق ايدييورم، گورويورم. اورانڭ أحمدلرينڭ هديه‌سنى عموم او كوى حسابنه بر تبرّك دييوب، اوپوب باشمه قويدم.
* * *
    عزيز، صدّيق قارداشلرم!
    جنابِ حقّه حدسز شكر اولسون كه، غايت شدّتلى و دهشتلى خسته‌لغم، غايت مرحمتلى و چوق ثوابلى اولارق عافيته يرينى بيراقوب گيتدى. چوق بيوك بر نعمت، ايچنده بولونديغنى بن و بوراده‌كى آرقداشلرم تصديق ايتدك.
    هم جنابِ حقّه حدسز شكر و حمد ايدييورم كه؛ سزلرڭ بو دفعه‌كى هديۀِ رمضانيه‌ڭز اولان چوق گوزل نسخه‌‌لريڭز؛ بو بايراممى چوق بايراملرى بردن طوپلايان بر كلّى بايرام حكمنه گچدى. و بِالخاصّه ايكنجى خسرو اولان برنجى طاهرڭ غايت دقّت و توافقلى يازديغى رساله‌لر بنى او درجه منّتدار و مسرور ايدييور كه، ألمدن گلسه ايدى هر بر نسخه‌سنه اون آلتون ليرا ويره‌جكدم. بو درجه قوّتلى بر شاكرد رسالۀِ النوره صاحب چيقماسى، اميدلريمزى چوق قوّتلنديردى.
    صاوه قهرمانلرينڭ و مباركلرڭ قريه‌لرينه كندى قريه‌سنى، اونلرڭ صفنه گتيردى. آتابگ (آراس) اونڭله و اونڭ گبيلرله إفتخار ايتملى. اونڭ نسخه‌لرنده ياڭليشلر پك چوق آزدر. يالڭز، اورالرده‌كى نسخه‌لرده معناسى آڭلاشيلميان بعض كلمه‌لر وارمش كه، إستنساخده اويله‌جه قيد ايديلمش. بنم تصحيحمدن گچن نسخه‌لره مقابله ايديلسه ايى اولور. او قوّتلى و فداكار قارداشمزڭ معصوم چوجقلرينڭ و رفيقه‌سنڭ يازدقلرى رساله‌لرى گوزلجه بر جلد ياپدق. گورنلره، خصوصًا بوراده‌كى رسالۀِ النورڭ قادينلر دائره‌سنده‌كى قيزلر و خانملره غايت تأثيرلى و جاذبه‌دار بر نمونۀِ تشويق اولدى.