ناصل ذكر دائره‌سنده بر مجلسده وياخود ختمۀِ نقشيه‌ده بر مسجدده بربريله علاقه‌دار هيئتِ مجموعه‌ده نورانى بر وضعيت حسّ ايديلييور. قلبى هشيار بر ذات، نمازدن صوڭره {سُبْحَانَ اﷲِ سُبْحَانَ اﷲِ} دييوب تسبيحى چكركن، او دائرۀِ ذكرڭ رئيسى اولان ذاتِ أحمديه عليه الصلاة والسلامڭ مواجهه‌سنده، يوز ميليون تسبيح ايدنلر، تسبيح ألنده چكدكلرينى معنًا حسّ ايدر؛ او عظمت و علويتله {سُبْحَانَ اﷲِ سُبْحَانَ اﷲِ} دير. صوڭره او سرذاكرڭ أمرِ معنويسيله اوڭا إتّباعًا {اَلْحَمْدُ ِﷲِ اَلْحَمْدُ ِﷲِ} ديديگى وقت، او حلقۀِ ذكرڭ و او چوق گنيش دائره‌سى بولنان ختمۀِ أحمديه عليه الصلاة والسلامڭ دائره‌سنده يوز ميليون مريدلرڭ {اَلْحَمْدُ ِﷲِ اَلْحَمْدُ ِﷲِ} لرندن تظاهر ايدن عظمتلى بر حمدى دوشونوب ايچنده {اَلْحَمْدُ ِﷲِ} ايله إشتراك ايدر و هكذا... {اَﷲُ أَكْبَرُ اَﷲُ أَكْبَرُ} و دعادن صوڭره {لاَ إِلٰهَ إِلاَّ اﷲُ لاَ إِلٰهَ إِلاَّ اﷲُ} اوتوز اوچ دفعه او طريقتِ أحمديه عليه الصلاة والسلامڭ حلقۀِ ذكرنده و ختمۀِ كبراسنده او سابق معنا ايله او إخوانِ طريقتى نظره آلوب، او حلقه‌نڭ سرذاكرى اولان ذاتِ أحمديه عليه الصلاة والسلامه متوجّه اولوب {اَلْفُ اَلْفِ صَلاَةٍ وَ اَلْفُ اَلْفِ سَلاَمٍ عَلَيْكَ يَا رَسُولَ اﷲِ} دير، دييه آڭلادم و حسّ ايتدم و خيالاً گوردم. ديمك تسبيحاتِ صلاتيه‌نڭ چوق أهمّيتى وار.
    ايكنجى مسئله: اوتوز برنجى آيتڭ إشارتنڭ بياننده، {يَسْتَحِبُّونَ الْحَيٰوةَ الدُّنْيَا} بحثنده دينلمش كه: بو عصرڭ بر خاصّه‌سى شودر كه؛ حياتِ دنيويه‌يى، حياتِ باقيه‌يه بيله‌رك ترجيح ايتديرييور. يعنى قيريله‌جق بر جام پارچه‌سنى، باقى ألماسلره بيلديگى حالده ترجيح ايتمك بر دستور حكمنه گچمش. بن بوندن چوق حيرت ايدييوردم. بوگونلرده إخطار ايديلدى كه:
    ناصل بر عضوِ إنسانى خسته‌لانسه، ياره‌لانسه سائر أعضا وظيفه‌لرينى قسمًا بيراقوب اونڭ إمدادينه قوشار؛ اويله ده، حرصِ حيات و حفظى، ذوقِ حيات و عشقى طاشيىان و فطرتِ إنسانيه‌ده درج ايديلن بر جهازِ إنسانيه، چوق أسباب ايله ياره‌لانمش، سائر لطائفى كنديله مشغول ايدوب سقوط ايتديرمگه باشلامش؛ وظيفۀِ حقيقيه‌لرينى اونلره اونوتديرمغه چاليشييور