بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ عَاشِرَاتِ دَقَائِقِ هٰذِهِ الشُّهُورِ الثَّلاَثَةِ
    عزيز، صدّيق قارداشلرم!
    أوّلا: سزڭ گچمش ليلۀِ معراج و گله‌جك ليلۀِ برائتڭزى تبريك ايدييورز و مقبول دعالريڭزى رجا ايدييورز.
    ثانيًا: يگرمى بشنجى سوز اولان معجزاتِ قرآنيه‌نڭ نصفِ آخرى، عجله‌لك بلاسيله غايت مجمل قالماسنه بدل؛ سزه أوّلجه يازديغم گبى، بعض لاحقه‌لرى اونڭ آخرنده إلحاق ايتمشدك. شيمدى أڭ مهم بر پارچه، يگرمى سنه أوّل طبع ايديلن لمعاتده گوردك. اونڭ ده معجزاتِ قرآنيه ذيللرى ايچنه درجى پك مناسب گورولدى. قهرمان طاهرينڭ بڭا گتيرديگى بر نسخه لمعاتى چوق قيمتدار گوردم. أگر بر نسخه داها او حواليده وارسه، سز ده او پارچه‌يى نسخه‌لريڭزڭ آخرينه يازارسڭز. ذاتًا لمعات، كنديسى ده خارقه‌در. رمضانِ شريفده يگرمى گون ظرفنده، نثر بر صورتده، تكلّفسز بردن يازيلمش. صوڭره باقدق، سهلِ ممتنع گبى بر نثرِ منظوم و بر نظمِ منثور صورتنى آلمش. ايچنده بو پارچه داها خارقه‌در. لمعاتده او پارچه‌نڭ سرلوحه‌سى: ”ايجاز ايله بيان إعجازِ قرآن.“
          ”بر زمان رؤياده گوردم كه: آغرى طاغى آلتنده‌يم. بردن طاغ پاطلادى، طاغ گبى طاشلرى عالمه طاغيتدى، صارصدى جهانى.“ بوندن تا،
          ”طرزِ نظر ايكيدر؛ برى ظلمتدار، ديگرى ضيادار“ سرلوحه‌سنه قدر. أگر لمعات سزڭ ألڭزه گچمه‌مشسه، او پارچه‌يى بورادن سزه گوندره‌جگز.
    ثالثًا: هم لطيف، هم گوزل، ظريف بر حادثه‌يى سويله‌يه‌جگم: بو مملكتده رسالۀِ النوره أرككلردن زياده فداكارانه ياپيشان إختياره خانملر و إختياره حكمنده معصومه گنج خانملر، أسكى زمان صيرمالى و يالديزلى گلينلك جهازاتنڭ ايچنده قيمتدار پارچه‌لرى رسالۀِ النورڭ أجزالرينڭ جلدلرى اوستنه چكوب، بتون رساله‌لر آلتون يالديز ايله جلدله‌مش گبى بر طرزه گيردى. رسالۀِ النورڭ معنًا گوزللگنه و خسرو و طاهرى و عليلرڭ و حسن عاطف و عاصم گبى قارداشلريمزڭ يالديزلى يازيلرينڭ جمالنه، جلدى اوستنده ده شيرين بر گوزللك داها علاوه ايتديلر. حافظ علينڭ مكتوبنده يازديغى امّهان و شاهينده دگرنده، بوراده رسالۀِ النوره بتون قوّتيله چاليشان چوق همشيره‌لريمز وار. مثلا آسيه، ثانيه، علويه، لطفيه، عليه گبى رسالۀِ النورڭ شاكردلرى، اوراده‌كى همشيره‌لرينه و قارداشلرينه سلام و دعا ايدييورلر
* * *