عزيز، صدّيق قارداشلرم!
    سزڭ فوق العاده ثبات و إخلاصڭزڭ غلبه‌سى و او مصيبتى دفعندن صوڭره، أهلِ دنيا جبهه‌يى دگيشديردى. زندقه‌نڭ دسيسه‌لريله بو حواليده بزلره قارشى پرده آلتنده مادّى و معنوى تحشيداتى باشلامش. غايت دقّتله و شيطانجه‌سنه، شاكردلرڭ حقيقى قوّتلرى اولان تساندى بوزمغه چاليشييورلر. سزلره رساله‌لرى إعاده ايتدكلرى حالده، قورنازجه‌سنه دولابلر چوريلييور. بز سزڭ بر شعبه‌ڭز حكمنده اولديغمز حالده، بزى أصل و مركز تلقّى ايتدكلرندن، داها زياده دسيسه‌لرى بزه قارشى إستعمال ايدييورلر. حافظِ حقيقى جنابِ حقدر. إن شاء اﷲ هيچ بر ضرر ايده‌ميه‌جكلر. فقط بو شهورِ مباركه‌نڭ أيّام و ليالئِ مباركه‌سنده خالص دعالريڭز ايله بزه يارديم ايديڭز. بر شى يوق. فقط ممكن اولدقجه إحتياطلى و دقّتلى اولڭز. حضرتِ على (رضى اﷲ عنه) و غوثِ گيلانى (قُدِّسَ سِرُّهُ) گبى قهرمانلرڭ معنوى تأميناتى {قُلْ وَ لاَ تَخَفْ} و {وَلاَ تَخْشَ} خطابلرى، بزه هر وقت جسارت و قوّۀِ معنويه ويرييور.
    كاتب عثمانڭ مكتوبنده، قهرمان رشدينڭ بهادر برادرى برهانڭ، رساله‌لرڭ قورتولمسنه چوق خدمت ايتديگنى يازييور. ذاتًا او جسور قارداشمزڭ أسكيدن ده بو چشيد خدمتلرى واردى. هم اوڭا، هم رسالۀِ النورڭ قورتولمسنه چاليشانلره و مدخلى بولونانلره، حتّى محكمه رئيسنه و إنصافلى أعضالرينه هم دعا، هم تشكّر ايدييورز. مناسب گورولسه، محكمه رئيسنه خصوصى تشكّرمزى بيان ايدرسڭز.