أزجمله: حياتِ إجتماعيه‌يى إداره ايدن أڭ مهم أساس اولان حرمت و مرحمت غايت صارصيلمش. بعض يرلرده غايت أليم و بيچاره إختيارلر و پدر و والده‌لر حقّنده دهشتلى نتيجه‌لر ويرييور. جنابِ حقّه شكر كه؛ رسالۀِ النور بو مدهش تخريباته قارشى، گيرديگى يرلرده مقاومت ايدييور، تعمير ايدييور. سدِّ ذو القرنيْنڭ تخريبيله، يأجوج و مأجوجلرڭ دنياىى فساده ويرمه‌سى گبى؛ شريعتِ محمّديه (ع‌ص‌م) اولان سدِّ قرآنينڭ تزلزليله يأجوج و مأجوجدن داها مدهش اولارق أخلاقده و حياتده ظلمتلى بر آنارشيلك و ظلملى بر دينسزلك فساده و إفساده باشلايور.
    رسالۀِ النورڭ شاكردلرى، بويله بر حادثه‌ده معنوى مجاهده‌لرى، إن شاء اﷲ زمانِ صحابه‌ده‌كى گبى آز عملله، پك چوق بيوك ثواب و أعمالِِ صالحه‌يه مدار اولور.
    عزيز قارداشلرم! ايشته بويله بر زمانده، بو دهشتلى حادثاته قارشى، إخلاص قوّتندن صوڭره بزم أڭ بيوك قوّتمز؛ إشتراكِ أعمالِِ اُخروى دستوريله بربريمزه قلملر ايله، هر برينڭ أعمالِِ صالحه دفترينه حسنات يازديردقلرى گبى، لسانلريله هر برينڭ تقوا قلعه‌سنه و سپرينه قوّت و إمداد گوندرمكدر. و بِالخاصّه فورطنه‌لى تهاجمه هدف اولان بو فقير و عاجز قارداشڭزه، بو مبارك شهورِ ثلاثه‌ده و أيّامِ مشهوره‌ده يارديمنه قوشمق، سزڭ گبى قهرمان و وفادار و شفقتكارلرڭ شأنيدر. بتون روحمله بو إمدادِ معنوى‌يى سزدن رجا ايدييورم. و بن دخى، ايمان و صداقت شرطلريله، رسالۀِ النور طلبه‌لرينى بتون دعالريمه و معنوى قزانجلريمه، يگرمى درت ساعتده، إشتراكِ أعمالِِ اُخرويه دستوريله، بعضًا يوز دفعه‌دن زياده رسالۀِ النور طلبه‌لرى عنوانيله حصّه‌دار ايدييورم.
سعيد النورسى