عزيز، صدّيق قارداشلرم!
    أوّلا: سكسان كسور سنه بر عمرِ معنوى‌يى سزلره قزانديره‌جق اولان شهورِ ثلاثۀِ مباركه‌يى و بِالخاصّه بو گيجه‌كى ليلۀِ رغائبى تبريك ايدييورز. سزڭ برائتڭز و معنًا غلبه‌ڭز، ظالملرى شاشيرتدى. جبهه‌يى بوراده دگيشديرديلر. دشمنانه تعرّضدن واز گچوب، دوستانه حلول ايدوب، خاص طلبه‌لرى رسالۀِ النورڭ خدمتندن گرى بيراقمق ايچون، مأموريت گبى بر مشغله بولويورلر ويا ترفيعًا ايشى چوق ديگر بر مأموريته ويا ديگر بر مشغله‌يى بولويورلر. بوراده او نوعدن چوق واقعه‌لر وار. بو تعرّض بر جهتده داها ضررلى گورونويور.
    ثانيًا: بوراده ليسه مكتبنه تأثيرلى بر نور گيردى. او ده اوتوز ايكنجى سوزڭ برنجى موقفى، اوتوزنجى لمعه‌نڭ إسمِ عَدْل و حَكم نكته‌لرى، طبيعت لمعه‌سى خاتمه‌سنه قدر، آيت الكبرانڭ ”أوت بو دنيا مملكتنه و مسافرخانه‌سنه گيرن هر بر مسافر...“ دييه باشلايان برنجى مقامڭ باشندن (إلهام، وحى مرتبه‌لرى خارج قالوب) تا اون سكزنجى مرتبه اولان كائناتڭ حدوث حقيقتى تا إمكانه قدر، يڭى حروفله، بر إخطارِ معنوى ايله إذن ويردك. داقتيلو (أل ماكينه‌سى) ايله كنديلرينه يازديلر. سز ده بو درت پارچه‌يى بردن جلد ياپوب، يڭى حروفله، أهلِ إنكاره اون ايكيلك طوپ گلّه‌سى گبى آتابيليرسڭز.
  بن بو سنه چوق ضعيف و إختيار و عاجز بر حالده بولونديغمدن، گنج قارداشلرمدن معنوى معاونتلرينى بو مبارك شهورِ ثلاثه‌ده رجا ايدييورم. هر بريسنه برر برر سلام و دارَينْده سلامتلرينه دعا ايدييورز.
سعيد النورسى