(بو مكتوب غايت أهمّيتليدر)
    عزيز، صدّيق قارداشلرم!
    بوگونلرده قرآنِ حكيمڭ نظرنده ايماندن صوڭره أڭ زياده أساس طوتولان تقوا و عملِ صالح أساسلرينى دوشوندم. تقوا، منهياتدن و گناهلردن إجتناب ايتمك؛ و عملِ صالح، أمر دائره‌سنده حركت و خيرات قزانمقدر. هر زمان دفعِ شر، جلبِ نفعه راجح اولمقله برابر؛ بو تخريبات و سفاهت و جاذبه‌دار هوسات زماننده بو تقوا اولان دفعِ مفاسد و تركِ كبائر اُسّ الأساس اولوب، بيوك بر رجحانيت كسب ايتمش.
    بو زمانده تخريبات و منفى جريان دهشتلنديگى ايچون، تقوا بو تخريباته قارشى أڭ بيوك أساسدر. فرضلرينى ياپان، كبيره‌لرى ايشله‌مه‌ين، قورتولور. بويله كبائرِ عظيمه ايچنده عملِ صالحڭ إخلاصله موفّقيتى پك آزدر. هم آز بر عملِ صالح، بو آغير شرائط ايچنده چوق حكمنده‌در.
    هم تقوا ايچنده بر نوع عملِ صالح وار. چونكه بر حرامڭ تركى واجبدر. بر واجبى ايشله‌مك، چوق سنّتلره مقابل ثوابى وار. تقوا، بويله زمانلرده، بيڭلر گناهڭ تهاجمنده بر تك إجتناب، آز بر عملله، يوزر گناه تركنده، يوزر واجب ايشلنمش اولويور. بو أهمّيتلى نقطه نيتيله، تقوا ناميله و گناهدن قاچنمق قصديله، منفى عبادتدن گلن أهمّيتلى أعمالِِ صالحه‌در.
    رسالۀِ النور شاكردلرينڭ بو زمانده أڭ مهم وظيفه‌لرى، تخريباته و گناهلره قارشى تقوايى أساس طوتوب طاورانمق گركدر. مادام هر دقيقه‌ده، شيمديكى طرز حياتِ إجتماعيه‌ده يوز گناه إنسانه قارشى گلييور؛ ألبته تقوا ايله و نيتِ إجتناب ايله يوز عملِ صالح ايشله‌مش حكمنده‌در. معلومدر كه؛ بر آدمڭ بر گونده خراب ايتديگى بر سرايى، يگرمى آدم يگرمى گونده ياپاماز و بر آدمڭ تخريباتنه قارشى يگرمى آدم چاليشمق لازم گليركن؛ شيمدى بيڭلر تخريباتجى‌يه مقابل، رسالۀِ النور گبى بر تعميرجينڭ بو درجه مقاومتى و تأثيراتى پك خارقه‌در. أگر بو ايكى متقابل قوّتلر بر سويه‌ده اولسه ايدى، اونڭ تعميرنده معجزه‌وارى موفّقيت و فتوحات گوروله‌جكدى.