برنجيسى: آسايشى تأمين و إداره مأمورلرى، إنضباط پوليسلرى و قوميسرلرى بزه و مسلگمزه قارشى دگل توهّمكارانه تعرّض و أوهامه دوشمك، بلكه حمايتكارانه تشويق و تشجيع ايتمك وظيفه‌لرينڭ مقتضاسيدر. چونكه: اونلرڭ وظيفه‌لرينڭ تمل طاشى، حرمت، مرحمت، حلال حرامى بيلمكله، إطاعت دستوريله حياتِ إجتماعيه أمنيت دائره‌سنده جريان ايده‌بيلير. رسالۀِ النور حياتِ إجتماعيه‌يه باقديغى وقت، بو أساسلرى تأمين ايدييور. نتيجه‌سى ده بِالفعل گورولمش. رسالۀِ النورڭ أڭ مهم مركزى إسپارطه و قسطمونى اولديغندن، سائر مملكته نسبةً ضابطه مأمورلرى إنصافله دقّت ايتسه‌لر، رسالۀِ النورڭ اونلره پارلاق يارديمنى گوره‌جكلر.
    هم طلبه‌لرنده بو قدر كثرت و قوّت و حق أللرنده بولونديغى حالده، آسايشه هيچ بر ضررى طوقونمديغنى و طلبه‌لردن بيڭ آدم، اون آدم قدر حياتِ إجتماعيه‌يه ضرر ويرمدكلرينى، قلبى بوزوق اولميان گورور.
    بو مسئله‌نڭ سرِّ حكمتى بودر كه: عالمِ إنسانيتده و إسلاميتده اوچ معظّم مسئله اولان ايمان و شريعت و حياتدر. ايچلرنده أڭ معظّمى ايمان حقيقتلرى اولديغندن بو حقائقِ ايمانيه‌'ِ قرآنيه باشقه جريانلره، باشقه قوّتلره تابع و آلَت ايديلمه‌مك و ألماس گبى او قرآنڭ حقيقتلرى، دينى دنيايه صاتان ويا آلَت ايدن آدملرڭ نظرنده جام پارچه‌لرينه اينديرمه‌مك و أڭ قدسى و أڭ بيوك وظيفه اولان ايمانى قورتارمق خدمتنى تام يرينه گتيرمك ايچون، رسالۀِ النورڭ خاص و صادق طلبه‌لرى، غايت شدّت و نفرتله سياستدن قاچييورلر. حتّى سزڭ بو قارداشڭز (سز ده بيليرسڭز) بو اون سكز سنه‌در، او قدر محتاج اولديغم حالده سياسته، حياتِ إجتماعيه‌يه تماس ايتمه‌مك ايچون، حكومته قارشى بر تك مراجعتم اولماديغنى و بو سكز طوقوز آيدر كُرۀِ أرضڭ بو هرج و مرجندن بر تك دفعه نه سؤال و نه ده مراق ايتمك و نه ده آڭلامق و نه ده مدارِ صحبت ايتمديگمى حتّى شيمدى صلح اولمش مى، حرب بيتمش مى، إنگليز و آلماندن باشقه كيملر حرب ايدييور بيلمديگمى، بيلييورسڭز.
    هم هركسى گوه‌زه و سرسم ايدن و اوچ سنه‌دن بَرى اوطه‌مدن ايشيديلن راديويى، ايكى دفعه‌دن باشقه نه ديڭله‌ديگمى و نه ده صورديغمى، بنمله برابر اولان سزلر بيلييورسڭز. بو درجه بو وضعيتلره قارشى علاقه‌سز و لاقيد بر آدمڭ تعقيب ايتديگى مسلگه تعرّض ايدن و أوهامه دوشوب ترصّدله صيقنتى ويرن، نه درجه إنصافدن اوزاق دوشدىگنى أڭ إنصافسز ده تصديق ايدر.