رسالۀِ النورڭ ترجمانى و مؤلّف و صاحبى بولنان ذات، بيڭ اوچ يوز يگرمى درت (١٣٢٤) و يگرمى بش (١٣٢٥) رومى سنه‌لرنده، إستانبولده إشتهارله ”بديع الزمان“ نامى و لقبى آلتنده مطبوعاتڭ ستايشله نشرياتندن متحسّس اولارق، او زمان اون يدى ياشمده بولنديغم و چوق جاهل و چوجقلق دوره‌سنده ايكن، بو مبارك إسم قلبمده ير طوتمش. و بو قلبى محبّت حرمتى ايچون اولاجق كه؛ بيڭ اوچ يوز يگرمى آلتى (١٣٢٦) سنه‌سنده حضرتِ استادڭ ”بديع الزمان سعيدِ كردى“ لقبى آلتنده قره دڭز سياحتنده ايكى خدمتكارى ايله اينه‌بولى‌يى زيارت ايده‌رك، او زمان اينه‌بولينڭ مشهور علماسندن حاجى ضيا و ديگر علما آراسنده واپوره تشييع ايديلديگى صيراده تصادفًا چارشوده قارشيلاشديغم و چوق درين محبّت حسّيله بو مبارك ذاته سلام طورارق متبسّم و نورانى سيمالريله و كسكين نظرلريله سلاملرينه و معنوى نظرلريله إلتفاتلرينه مظهر اولديغم گوندن بَرى آرتان محبّت و علاقه‌مى، اوتوز سنه‌لك خاطرمدن قطعيًا سيلنمديگنى عين اليقين گورويوردم.
    تخمينًا و تقريبًا آلتى سنه أوّل بر غزته ستوننده، إسپارطه‌ده خلقڭ فضله علاقه گوسترمسندن، دين و ايمان تلقين ايتمه‌سندن اوركن أهلِ دنيا طرفندن توقيف ايديلديگنى تأثّرله اوقومشدم. اوتوز سنه‌لك اوزون بر زمان ايچنده بر دفعه بويله آجى خبر آلدىغم حالده، عاقبتندن قطعيًا باشقه بر معلومات ايدينه‌مه‌مشدم. اون سنه‌دن بَرى جنابِ ربّ العالمين حضرتلرندن نيازمده، دائما بش وقت دعالرمده، ”يا رب! بڭا بر مرشدِ كامل إحسان بيور“ نيازنده ايكن، بوندن اوچ سنه أوّل يعنى هجرى بيڭ اوچ يوز أللى يدى (١٣٥٧) و ميلادى بيڭ طوقوز يوز اوتوز سكز (١٩٣٨) سنه‌سنده، اينه‌بوليده بر قهوه‌ده، قسطمونيلى بر زواللى سرخوشڭ ستايشله بحث ايتديگى بر ذاتڭ قسطمونيده موجوديتى و منفى اولارق بولونديغنى ايشيتدم. دقّت ايتدم و تحقيق و تعميق ايتدم. آڭلادم كه؛ اوتوز سنه‌در قلبمده صاقلى اولارق طاشيديغم او زمانكى سعيدِ كردى اولديغنى حيرتله اوگره‌ندم. و قلبمده‌كى سوگى گونلر گچدكجه آتشلنديگنى حسّ ايتديگمدن، هر تهلكه‌يى گوزه آلارق زيارت ايدوب، مبارك أللرينى اوپمك لازم و شرط اولديغنى بيلدم. و زيارتمده، أسكى سعيدڭ إسمِ مباركلرى بديع الزمان سعيد نورسى و رسالۀِ النورڭ مؤلّفى و صاحبى اولارق بولدم. كمالِ عشق و إخلاصله صاريلدم. و بنم يگانه مرشدم و رهبرم و بيوك استادم او رسالۀِ النوردر ديدم. و بڭا بو حدسز إحساناتى هدايت و عنايت بيوران جنابِ حقّه، قرآنِ حكيمڭ حرفلرى عددنجه شكر ايده‌رك {اَلْحَمْدُ ِﷲِ هٰذَا مِنْ فَضْلِ رَبِّى} ديدم. (حاشيه)