أمينله فيضى‌نڭ صوردقلرى بر سؤاله استاددن آلدقلرى جواب
    سؤال: بزه ويرديگڭز جوابده دييورسڭز: ”سياسى گنيش دائره‌لرى مراق ايله تعقيب ايدن، كوچك دائره‌لر ايچنده‌كى وظيفه‌لرنده ضرر ايدر.“ بونڭ ايضاحنى ايسته‌يورز؟
    الجواب استاديمز دييور كه:
    أوت بو زمانده مراق ايله، راديو واسطه‌سيله، جدّى علاقه‌دارانه كُرۀِ أرضده‌كى بوغوشمالره مراق ايدوب باقانلر، دقّت ايدنلر، مادّى و معنوى پك چوق ضررلرى واردر. يا عقلنى طاغيتير معنوى بر ديوانه اولور، يا قلبنى طاغيتير معنوى بر دينسز اولور، يا فكرينى طاغيتير معنوى بر أجنبى اولور. أوت بن كندم گوردم: لزومسز بر مراق ايله، متديّن ايكن عامى بر آدم (برى‌ده علمه منسوبيتى واركن) أسكيدن بَرى إسلام دشمنى اولان بر كافرڭ مغلوبيتيله آغلامق درجه‌سنده بر محزونيت و آلِ بيتدن سيّدلر جماعتنڭ بر كافره قارشى مغلوبيتندن مسروريتنى گوردم. بويله عامى بر آدمڭ، علاقه‌سز بر گنيش دائرۀِ سياست خاطرى ايچون، بويله كافر بر دشمنى مجاهد بر سيّده ترجيح ايتمك، عجبا ديوانه‌لگڭ و عقلى طاغيتمقلغڭ أڭ عجيب بر مثالى دگل ميدر؟
    أوت خارجى سياست مأمورلرى و أركانِ حربلر و قوماندانلره بر درجه وظيفه‌جه مناسبتى بولنان سياستڭ گنيش دائره‌لرينه عائد مسائلى؛ بسيط فكرلى و إدارۀِ روحيه و دينيه‌سنه و شخصيه‌سنه و بيتيه‌سنه و قريه‌سنه عائد لزوملى وظيفه‌سنى گرى بيراقديرمقله، اونلرى مراقلانديروب روحلرينى سرسرى، عقللرينى گوه‌زه و قلبلرينى ده حقائقِ ايمانيه و إسلاميه‌يه عائد ذوقلرينى، شوقلرينى قيروب هوالانديرمق و او قلبلرى سرسرى ايتمك و معنًا ئولديرمك ايله دينسزلگه ير إحضار ايتمك طرزنده، كمالِ مراق ايله اونلره گوره مالايعنى و لزومسز مسائلِ سياسيه‌يى راديو ايله درس وىروب ديڭلتديرمك، حياتِ إجتماعيۀِ إسلاميه‌يه اويله بر ضرردر كه؛ ايلريده ويره‌جگى نتيجه‌لرى دوشوندكجه تويلر اورپرر.
    أوت هر بر آدم وطنيله، ملّتيله، حكومتيله علاقه‌داردر. فقط بو علاقه‌دارلق، موقّت جريانلره قاپيلوب ملّت و وطننى و حكومتڭ منفعتنى بعض شخصلرڭ موقّت سياستلرينه تابع ايتمك، بلكه عيننى تلقّى ايتمك چوق ياڭليش اولمقله برابر؛ او وطنپرورلك، ملّتپرورلك حسّندن و وظيفه‌سندن هركسه دوشن وظيفه بر ايسه، كندى قلب و روحندن، إدارۀِ شخصيه و بيتيه و دينيه و هكذا چوق دائره‌لرده حقيقى وظيفه‌دار اولديغى خدمت و علاقه و مراق اون، يگرمى بلكه يوزدر. بو جدّى و لزوملى بو قدر چوق علاقه‌لرڭ ضررينه اولارق، او بر تك لزومسز و اوڭا گوره مالايعنى اولان سياست جريانلرينه فدا ايتمك، ديوانه‌لك دگل ده نه‌در