بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ حَاصِلِ ضَرْبِ عَاشِرَاتِ دَقَائِقِ رَمَضَانَ فِى حُرُوفِ مَا كَتَبْتُمْ مِنَ الرَّسَائِلِ
    عزيز، صدّيق قارداشلرم!
    هم مبارك رمضانڭزى، هم إن شاء اﷲ حقّڭزده بيڭ آى قدر ميوه‌دار ليلۀِ قدريڭزى، هم سعادتلى بايرامڭزى، هم چوق قيمتدار خدمتڭزى بتون روحمله تبريك و تسعيد ايدرم.
    قارداشلرم! بو دفعه قدسى قلمله هديه‌لريڭز او قدر بنى منّتدار و مسرور ايتدى كه، گويا دنياىى ايشيقلانديره‌جق بر نور فابريقه‌سى و ماضى و إستقبالى رايحۀِ طيّبه‌سيله معطّر ايده‌جك بر گل فابريقه‌سى سمادن بزم إمداديمزه گوندريلمش و بنم آرقه‌مده قوّة الظهر اولارق طورييور و متماديًا چاليشييورلر دييه مسرور اولويورم. يوز بيڭلر الحمد ِﷲ.
    صبرى قارداش! سنڭ فاصله‌لى ايكى مكتوبڭ، خدمتڭڭ مقبوليتنه ايكى شاهدِ غيبى گوستردى. سنڭ تعبيرڭ ايله نور فابريقه‌سنه بن ده ”اَلْفُ اَلْفِ ما شاء اﷲ، بارك اﷲ، وفّقك اﷲ“ ديرم. سن ايله صدّيق سليمان، بنم نظرمده و فكرمده و دعامده دائما برابر بولونديغڭزدن، سنڭ ايله قونوشديغم وقت، اوموز اوموزه ايكيڭزى برابر گورويورم. معصوم و مبارك چوجقلريڭز دعادن حصّه‌داردرلر.
    حافظ على قارداش! سنڭ مكتوبڭده‌كى تواضعڭ و إخلاصڭ و خسروه عائد مدحڭ و رسالۀِ النور طلبه‌لرى بر تك وجود حكمنده‌كى قناعتڭ، سنڭ حقّڭده بيوك بر اميديمى و حسنِ ظنّمى تام قوّتلنديردى. رسالۀِ النورڭ ايكى لطفيلرى و مصطفى‌لرى و حافظ عليلرى، كوچك صبرى اولان نور الدين ايله برابر خاص طلبه‌لر دائره‌سنده، رمضان فيضنه، معنوى قزانجلره إن شاء اﷲ حصّه‌دار قبول ايديلدى. هر بر صحيفه‌لرينى برر قيمتدار هديه حكمنده اولان نسخه‌لرڭ يوزندن، بن سڭا چوق هم پك چوق بورجلى قالدم